25 красавіка Мілінкевіч прыме ўдзел у мітынгу ў Гомелі :: Хартыя'97 :: Навiны

Кіраўнік абласнога штаба Аляксандра Мілінкевіча Уладзімір Кацора паведаміў, што на сходзе актывістаў штаба было прынята рашэнне аб арганізацыі і правядзенні 25 красавіка ў Гомелі мітынгу з удзелам Аляксандра Мілінкевіча, прымеркаванага да чарговай гадавіны чарнобыльскай катастрофы і стварэння новага дэмакратычнага руху.

2 красавіка адбылося паседжанне Гомельскага абласнога штаба Аляксандра Мілінкевіча, на якім было прынятае рашэнне аб працягу працы штаба і абмеркаваныя планы дзеянняў на бліжэйшы час.

Паводле яго інфармацыі, усе прадстаўнікі штаба выказаліся за працяг працы па падтрымцы Аляксандра Мілінкевіча як лідэра аб`яднаных дэмакратычных сіл. Пры гэтым былі вызначаны два асноўныя кірункі дзейнасці - аказанне ўсебаковай дапамогі жыхарам Гомельскай вобласці, якія пацярпелі ад рэпрэсій уладаў, і праца па стварэнні новага руху за свабоду, праўду і справядлівасць.

Што да падтрымкі пацярпелых грамадзян, то, зазначыў Уладзімір Кацора, зараз збіраюцца звесткі аб людзях, якія бралі ўдзел у акцыях пратэсту, былі затрыманыя і пакараныя адміністрацыйным арыштам. Так, паводле інфармацыі праваабаронцаў, у Мінку адбылі розныя тэрміны зняволення пяць жыхароў Мазыра, шэсць - Светлагорска, два - Рагачова. У.Кацора падкрэсліў, што ўсе гэтыя людзі ніяк не звязаны з дзейнымі ў рэгіёне палітычнымі арганізацыямі.

Уладзімір Кацора таксама паведаміў, што на сходзе актывістаў было прынята рашэнне аб арганізацыі і правядзенні 25 красавіка ў Гомелі мітынгу з удзелам Аляксандра Мілінкевіча, прымеркаванага да чарговай гадавіны чарнобыльскай катастрофы і стварэння новага дэмакратычнага руху.