Ці вызваляць Мiхаiла Марынiча? :: Хартыя'97 :: Навiны

26 красавiка будзе два гады, як Мiхаiл Афанасьевiч Марынiч знаходзiцца за кратамi. Рашэнне аб яго вызваленнi магло быць прынята яшчэ год таму, бо Марынiч — пенсiянер i iнвалiд II групы. Але, як нядаўна адзначыў на сустрэчы з журналiстамi старшыня Вярхоўнага суда Беларусi Валянцiн Сукала, пытанне аб умоўна-датэрмiновым вызваленнi Марынiча спачатку павiнна вырашыцца ў Мiнiстэрстве ўнутраных спраў, а потым адпаведныя дакументы будзе разглядаць суд.

“Але гэтае пытанне суд разгледзiць толькi тады, калi нам у адпаведным парадку прадставяць матэрыялы на ўмоўна-датэрмiновае вызваленне, — сказаў Сукала. — Пры гэтым матэрыялы рыхтуюцца папраўча-працоўнай установай, потым накiроўваюцца ў назiральную камiсiю. Як толькi гэтая працэдура будзе выканана, мы будзем гатовыя разгледзець гэтыя матэрыялы. Чаму яны не прыйшлi — мне цяжка сказаць. Вы можаце задаць гэтае пытанне мiнiстру ўнутраных спраў Уладзiмiру Навумаву, паколькi яно знаходзiцца ў кампетэнцыi Мiнiстэрства ўнутраных спраў”.

А вось што сказаў генерал-лейтэнант Навумаў, да якога “Народная воля” днямi звярнулася з гэтым пытаннем.

“Мiнiстэрства ўнутраных спраў толькi выконвае пакаранне, мы не выносiм прысудаў, — сказаў Уладзiмiр Уладзiмiравiч. — Якое пакаранне прадугледжана судом, такое мы i выконваем. Таму не трэба Мiнiстэрства ўнутраных спраў рабiць крайнiм у гэтым выпадку. Будзе рашэнне суда — мы яго выканаем”.

У адмiнiстрацыi калонii, дзе Марынiч адбывае пакаранне, сказалi, што “прэтэнзiй да паводзiн гэтага асуджанага няма”, таму ў блiжэйшы час пытанне аб умоўна-датэрмiновым вызваленнi палiтыка павiнна быць вырашана...

***

30 снежня 2004 года раённы суд Мiнска прызнаў М.Марынiча вiнаватым ў завалодваннi аргтэхнiкай, якая была перададзена пасольствам ЗША ў часовае карыстанне грамадскай арганiзацыi “Дзелавая iнiцыятыва”, якой кiраваў Марынiч. Палiтыка прыгаварылi да пяцi гадоў пазбаўлення волi ў калонii ўзмоцненага рэжыму з канфiскацыяй маёмасцi.

18 лютага 2005 года тэрмiн утрымання пад вартай быў скарочаны да 3 гадоў i 6 месяцаў.

У калонii М.Марынiч перанёс iнсульт i цяжкае захворванне вачэй.

Даша ПАЎЛОЎСКАЯ, “Народная воля”

mmmmm