Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Кіраўніцтва Нарвегіі сустракаецца з Аляксандрам Мілінкевічам 14:33, 20/04/2006
Нарвегія падзяляе ацэнку прэзідэнцкіх выбараў у Беларусі дадзеную Еўрасаюзам, не прызнае іх вынікі і не лічыць Аляксандра Лукашэнку легітымна абраным прэзідэнтам. Пра гэта было заяўлена сёння ў Осла на сустрэчы прэм’ер-міністра Нарвегіі Енса Сталтэнберга і дзяржсакратара гэтай краіны Мортэна Ветланда з лідэрам дэмакратычнай Беларусі Аляксандрам Мілінкевічам.
- Прэм’ер-міністр даў адназначную і вельмі жорсткую ацэнку сітуацыі ў Беларусі. Было заяўлена, што да таго часу пакуль Беларусь не вернецца на шлях дэмакратызацыі, развіццё сітуацыі ў нашай краіне будзе знаходзіцца пад пільным наглядам ўрада Нарвегіі. Кіраўніцтва гэтай краіны заявіла пра безумоўную падтрымку дэмакратычных сілаў у Беларусі - сказаў пасля сустрэчы Аляксандр Мілінкевіч сайту milinkevich.org.
Падчас сустрэчы было адзначана тое, што ўрад Нарвегіі гатовы аказваць эканамічную дапамогу грамадзянскай супольнасці ў Беларусі.
Аляксандр Мілінкевіч таксама звярнуўся да кіраўніцтва Нарвегіі з просьбай зрабіць усемагчымыя захады па вызваленні з-за кратаў былога кандыдата ў прэзідэнты Аляксандра Казуліна і ўсіх беларускіх палітзняволеных, а таксама аказаць падтрымку пацярпелым ад рэпрэсій.
Нарвежскі бок выказаў таксама меркаванне, што Расія павінна прадэманстраваць сваю прыхільнасць дэмакратычным каштоўнасцям і далучыцца да ацэнкі вынікаў прэзідэнцкіх выбараў, якія даў Еўрасаюз.
- Я магу толькі пазітыўна ацаніць той факт, што колькасць краін, якія не толькі хочуць, але і гатовыя рэальна садзейнічаць вяртанню ў Беларусь дэмакратыі павялічваецца, - адзначыў Аляксандр Мілінкевіч, гаворачы пра першыя вынікі візіта ў Нарвегію.
Сёння ў праграме візіту Аляксандра Мілінкевіча таксама перамовы з кіраўніком Пастаяннага камітэта Парламента Нарвегіі па міжнародных справах Олафам Аксэлсэнам.
Аляксандр Мілінкевіч выступіць таксама з дакладам на канферэнцыі, арганізаванай Нарвежскім Хельсінскім камітэтам. Даклад будзе тычыцца бягучай сітуацыі ў Беларусі і магчымых сцэнароў найбліжэйшай будучыні Беларусі. Удзел у канферэнцыі з беларускага боку возьме таксама міжнародны каардынатар Хартыі`97 Андрэй Саннікаў.
21 красавіка адбудзецца сустрэча Аляксандра Мілінкевіча з міністрам замежных спраў Нарвегіі Ёнасам Гахрам Сторам.
Візіт лідэра дэмакратычнай Беларусі Аляксандра Мілінкевіча выклікаў зацікаўленасць нарвежскіх і скандынаўскіх мас-медыяў.
, iнформэр
