Паліна Смолава будзе ўключана ў спіс асобаў, супраць якіх будуць ужытыя санкцыі Еўразвязу :: Хартыя'97 :: Навiны

Удзельніца пераважнай большасці канцэртаў "За Беларусь", моцная прыхільніца палітыкі Аляксандра Лукашэнкі і ўдзельніца Еўравізіі 2006 спявачка Паліна Смолава будзе ўключана ў спіс асобаў, супраць якіх будуць ужытыя санкцыі Еўразвязу. Гэтак вырашыла 20 красавіка грамадская камісія па стварэнні вышэйназванага спісу, паведаміла прэс-служба лідэра дэмакратычных сілаў Аляксандра Мілінкевіча.

Яшчэ месяц назад абмяркоўвалася пытанне, ці варта ўжываць санкцыі супраць удзельнікаў канцэртаў "За Беларусь". Спыніліся на тым, што ў спіс трапяць тыя, хто ў час ці па-за выступам адкрыта агітаваў "за бацьку". Дадатковай нагодай для ўжывання супраць Смолавай санкцыяў стала палоснае інтэрв`ю са спявачкай у "Беларускай газеце" за 17 красавіка. У гэтым матэрыяле артыстка фактычна агітавала за Лукашэнку і яго аўтарытарную палітыку.

Калі новыя спісы будуць зацверджаныя на працягу аднаго-двух месяцаў, Паліна Смолава рызыкуе не трапіць на фестываль "Еўравізія 2006", які праходзіць сёлета ў Грэцыі. У такім выпадку ёй будзе проста адмоўлена у атрыманні візы.

Сярод іншых вядомых артыстаў у спіс будуць уключаны Міхаіл Фінберг (член Савета Рэспублікі і дырыжор Нацыянальнага аркестра), Анатоль Ярмоленка (за незаконную агітацыю і за стварэнне песні "За Бацьку", якая фактычна культывуе Лукашэнку), некаторыя іншыя вядомыя музыкі.