КДБ спрабуе вербаваць актыўных студэнтаў БНТУ :: Хартыя'97 :: Навiны

Сёньня студэнтаў БНТУ, якія былі затрыманыя на Кастрычніцкай плошчы ў часе акцыяў 19-25 сакавіка, выклікалі ў рэктарат, дзе зь імі размаўляў старэйшы ўпаўнаважаны КДБ Дзьмітры Міхайлавіч Сьвістун, паведамляе сайт www.studenty.by.

Размова з кожным студэнтам праводзілася асобна. Некаторым зь іх спадар Сьвістун прапаноўваў супрацоўніцтва з КДБ , іншых проста пераконваў адмовіцца ад удзелу ў акцыях пратэсту, пры гэтым усім пагражаў адлічэньнем з унівэрсытэту.

Андрэй Шумароў, студэнт 2-га курса ФІТР БНТУ распавёў, як праходзіла сустрэча зь ім:

- Супрацоўнік КДБ на пачатку не хацеў называць сваё імя, але пасьля таго, як я катэгарычна адмовіўся размаўляць зь незнаёмым чалавекам – усё ж прадставіўся. Ён назваў сябе старэйшым ўпаўнаважаным Камітэта Дзяржаўнай Бясьпекі Сьвістуном Дзьмітрыем Міхайлавічам.

На думку Андрэя, у супрацоўніка КДБ не атрымалася правесьці размову ў тым кірунку, якім ён жадаў бы. На ўсе яго пытаньні студэнт адказваў сваімі пытаньнямі. Так, напрыклад, калі Сьвістун спытаў: “Што вы рабілі на плошчы?”, Андрэй адказаў сваім пытаньнем: “А як вы лічыце, што я рабіў на плошчы?”

Размова з Андрэем цягнулася даволі доўга, і ў часе яе спадар Сьвістун прапаноўваў Андрэю працу ў КДБ. На адмову Андрэя супрацоўнік КДБ паабяцаў студэнту праблемы ў здачы сэсіі.

Студэнта 3-га курса аўта-трактарнага ф-та БНТУ Міхаіла Літвінава, супрацоўнік КДБ вербаваць не спрабаваў, але пагражаў адлічэньнем з унівэрсытэта за ўдзел ў грамадзкіх акцыях пратэсту:

- Яго асноўная мэта была спыніць нашы дзеяньні запужаўшы нас адлічэньнем з унівэрсытэта. Спадар Сьвістун сказаў, што калі я буду удзельнічаць у Чарнобыльскім шляху 26-га красавіка і тым больш, калі буду затрыманы пад час яго – мяне дакладна выключаць з БНТУ. Але я лічу, што маю права на выказваньне сваёй нязгоды з тым, што адбываецца ў нашай краіне, і буду рабіць гэта надалей. Але, хачу адзначыць, што ў межах унівэрсытэта я займаюся толькі навучаньнем.