У Магілёве арыштаваны на 10 сутак актывіст апазыцыі :: Хартыя'97 :: Навiны

Намесьнік магілёўскай гарадзкой суполкі партыі БНФ, былы вязень турмы на Акрэсьціна Зьміцер Салаўёў быў затрыманы супрацоўнікамі міліцыі ў пятніцу, паведамляе радыё “Свабода”. Паводле пратаколу, ён нібыта нецэнзурна лаяўся ў банкаўскім цэнтры, размахваў рукамі і не падпарадкоўваўся заўвагам міліцыянтаў. Двое сутак Зьміцер Салаўёў правёў у ізалятары часовага ўтрыманьня. На знак пратэсту ён абвясьціў галадоўку. Праваабаронцы звязваюць арышт Салаўёва з Чарнобыльскім Шляхам, які мае адбыцца 26 красавіка. Відавочна, што ўлады збіраюцца інтэрнаваць актыўных апазыянераў напярэдадні акцыі.

Паводле Ўладзімера Краўчанкі, абаронцы інтарэсаў Салаўёва, судзьдзя Андрэй Юрчанка пры вынясеньні прысуду абапіраўся толькі на сьведчаньні міліцыянтаў. Ён адмовіўся выклікаць супрацоўнікаў банка і сувязістаў, якія былі сьведкамі затрыманьня.

Міліцыянты, сяржант Таранаў ды старшы прапаршчык Рыбакоў, у сваіх паказаньнях паўтарылі факты, выкладзеныя ў пратаколе. Сп. Юрчанка вынес прысуд без абвяшчэньня перапынку.

У судзе Зьміцер Салаўёў заявіў, што будзе працягваць галадоўку пратэсту.