Страціў працу яшчэ адзін удзельнік намётавага гарадка :: Хартыя'97 :: Навiны

У Светлагорску (Гомельская вобласць) звольнены з працы яшчэ адзін грамадскі актывіст. За апошні месяц гэта ужо другі выпадак у горадзе, калі чалавек страчвае працу ў сувязі з удзелам у якіх-небудзь акцыях у перыяд выбараў, паведамляе прэс-служба лідэра дэмакратычных сілаў Аляксандра Мілінкевіча.

20-гадовы Андрэй Музычэнка працаваў на Светлагорскім раённым вузле электрычнай сувязі вучням электраманцёра. Ён папрасіў водпуск на 15 дзён без захавання заробку. Заяву на водпуск прыняў яго непасрэдны кіраўнік – начальнік участка, які сказаў Андрэю, што хлопец можа выпраўляцца ў водпуск.

“Праз некалькі дзён мне затэлефанаваў дырэктар вузла электрасувязі – Аляксандр Балянкоў. З яго словаў я зразумеў: на працу мне лепш не вяртацца, бо з-за мяне будуць праблемы і ў іншых работнікаў. Таму я вымушаны быў напісаць заяву аб звальненні. Пасля я даведаўся, што з маім кіраўніцтвам пра мяне гутарылі супрацоунікі КДБ. Я лічу, што патрабаванне звольніцца было наступствам гэтай гутаркі” – расказаў Андрэй.

За удзел у акцыях салідарнасці 16 дня кожнага месяцу на вуліцах Светлагорску Андрэй узімку дастаўляўся ў міліцыю. 24 сакавіка яго арыштавалі ў Менску на 15 сутак за тое, што удзельнічаў у намётавым гарадку на цэнтральнай плошчы. Андрэй увесь час бярэ удзел у розных грамадскіх справах - напрыклад, з’яўляецца старшынём адной з моладзевах суполак ТБМ.

Па словах Андрэя, рэпрэсіі уладаў, якія накіраваныя супраць актыўнай моладзі, падштурхоўваюць маладых людзей да радыкальных дзеянняў.