Дэмсілы ў Гомелі абмяркоўваюць чарнобыльскія праблемы :: Хартыя'97 :: Навiны

Аляксандр Мілінкевіч бярэ сёння ўдзел у навукова-практычнай канфэрэнцыі “20 год з Чарнобылем”, якая пачалася ў Гомелі. На канферэнцыі навукоўцы, палітыкі, і грамадскія дзеячы абмяркоўваць праблемы, звязаныя з наступствамі аварыі на Чарнобыльскай АЭС. Улады адмовілі ўдзельнікам канфэрэнцыі ў арэндзе памяшкання ў палацы культуры, і з гэтай прычыны канфэрэнцыя адбываецца ў прыватным будынку.

Акрамя Аляксандра Мілінкевіча ўдзел у канфэрэнцыі бяруць кіраўнік партыі БНФ Вінцук Вячорка, прафсаюзны лідэр Аляксандр Бухвостаў, прафесар Іван Нікітчанка, былы старшыня камісіі ў чарнобыльскіх пытаннях ў Вярхоўным Савеце 12-га склікання Віктар Хоміч ды іншыя.

Як адзначыў для “Радыё Свабода” перад пачаткам канфэрэнцыі Аляксандр Мілінкевіч, “кожны год дэмакратычныя сілы праводзяць мерапрыемствы, прысвечаныя чарнобыльскай тэме, і вельмі важна, каб гэта былі не толькі шэсці і мітынгі, але і сустрэчы з навукоўцамі. Вельмі важна аналізаваць сытуацыю, каб папярэдзіць тое, што можа здарыцца ў найбліжэйшы час”.

Сёння на навуковай канфэрэнцыі аналізуецца, да якіх наступстваў вядзе вытворчасць сельскагаспадарчай прадукцыі ў забруджаных зонах, які стан здароўя людзей, псіхалагічныя аспекты і формы міжнароднага супрацоўніцтва.

Планавалася, што сёння ў Гомелі адбудзецца мітынг, прысвечаны 20-м угодкам Чарнобыльскай катастрофы. Аднак аблвыканкам не даў дазволу абласным арганізацыям Аб’яднанай грамадзянскай партыі і Партыі камуністаў Беларускай на правядзенне мітынгу.

Гэтаксама дэмакратычным актывістам было адмоўлена ў арэндзе памяшкання для канфэрэнцыі ў Палацы культуры таварыства глухіх “Віпра”.