Ідэёлягі вучаць гісторыкаў :: Хартыя'97 :: Навiны

Як стала вядома карэспандэнту belngo.info, адміністрацыя Беларускай Дзяржаўнай сельскагаспадарчай акадэміі (БДСГА) сканфіскавала на катэдры гісторыі і культуралёгіі дапаможнік для студэнтаў–завочнікаў па гісторыі Беларусі, як “неадпаведных дзяржаўнай ідэалёніі”.

Дапаможнік быў выдадзены калектывам аўтараў на сродкі Акадэміі і выраблены ў акадэмічнай друкарні накладам у 500 асобнікаў. Выпуск падобных выданьняў – шараговая падзея для ВНУ, але празь некалькі дзён пасьля таго, як брашура паступіла на катэдру, туды зьявіліся прадстаўнікі рэктарату і забралі з сабой амаль увесь наклад. Выкладчыкам, якія ўдзельнічалі ў падрыхтоўцы дапаможніка і атрымалі так званыя аўтарскія асобнікі, было прапанавана здаць іх дабраахвотна. Двое з аўтараў, Валеры Шчэрбаў і Аляксандар Каданьчык, адмовіліся гэта рабіць, заявіўшы, што па закону аўтарскі асобнік ёсьць уласнасьцю аўтара. У адказ ім прыгразілі прыцягненьнем да крымінальнай адказнасьці за крадзеж дзяржаўнай маемасьці, пасьля чаго абодва выкладчыкі прапанавалі адміністрацыі ВНУ выкупіць свае брашуры па любым кошце.

Пасьля гэтага інцыдэнту прафэсар гісторыі і дацэнт адпаведнай катэдры БДСГА Аляксандр Каданьчык быў выкліканы да прарэктара па выхаваўчай рабоце Аляксандра Чачоткіна, які патрабаваў здаць дапаможнік. Прарэктар таксама заявіў, што падручнік не адпавядае патрабаваньням дзяржаўнай ідэялегіі і выказаў прэтэнзіі да прафэсара, які “не прытрымліваецца ідэялягічных нормаў ў выкладаньні гісторыі”. Аналягічны выклік атрымаў і В.Шчэрбаў.

Дарэчы, Аляксандар Каданьчык, які шмат гадоў узначальвае грамадзкую асьветніцкую ініцыятыву “Далягляд”, а таксама раённае аддзяленьне ТБМ, не ўпершыню падвяргаецца ціску з боку адміныстрацыі БДСГА. У студзені гэтага года яго таксама выклікалі ў рэктарат і патрабавалі выйсьці з ініцыятыўнай групы Аляксандра Мілінкевіча, пагражаючы датэрміновым скасаваньнем кантракту. Прафэсар, я кому да пэнсіі засталося менш за год, катэгарычна адмовіўся ад такой прапановы.