Са сьцягам супраць сыстэмы :: Хартыя'97 :: Навiны

1 траўня ў Сьветлагорску грамадзкая актывістка Натальля Бордак выйшла на Цэнтральную плошчу з пратэстам супраць кантрактнай сыстэмы найму на працу.Перад будынкам раённага выканаўчага камітэту Н. Бордак, на плечы якой быў накінуты бел-чырвона-белы сьцяг, разгарнула транспарант “Работу – ахвярам сыстэмы!”. Гэта прыцягнула ўвагу людзей на плошчы, а таксама прадстаўнікоў улады, якія дзяжурылі ў выканкаме, паведамляе www.belngo.info.

Праз колькі хвілінаў з аддзелу міліцыі, які месьціцца на гэтай жа плошчы, да Н. Бордак падыйшлі двое міліцыянтаў. Яны спыталі, чаму яна тут стаіць, затэлефанавалі свайму начальству і сказалі жанчыне, што праблему з працай трэба вырашаць праз цэнтар занятасьці. На гэта Натальля адказала, што яе пазбавілі працы ў сувязі з удзелам у выбарчай кампаніі, пасьля чаго знайсьці новае працоўнае месца вельмі складана. Жанчына ўзгадала, што Ул.Кукар – супрацоўнік выканкаму, які перасьледваў яе за грамадзкую дзейнасьць – раіў ёй шукаць працу “у якой-небудзь свабоднай краіне”. “Асэнсоўваючы” словы Натальлі, адзін з міліцыянтаў мімаходзь заўважыў: “Свабодная краіна – гэта Амэрыка…” Затым міліцыянты сышлі.

Н. Бордак, якая зьяўляецца сакратаром мясцовай рады ТБМ, уваходзіла ў ініцыятыўную групу па вылучэньні кандыдатам у прэзыдэнты А. Мілінкевіча, зьбірала за яго подпісы і ўдзельнічала ў агітацыі. У сувязі з гэтым яна была звольненая зь мясцовага Цэнтру сацыяльнага абслугоўваньня, дзе працавала псыхолягам. Да таго ж, яна была пакараная штрафам за тое, што ў час агітацыі на вуліцы пляншэт з партрэтам А. Мілінкевіча стаяў “у непрызначаным месцы”. Але актывістка ня лічыць сябе вінаватай і адмаўляецца выплочваць штраф.