Суд закрыў справу супраць газеты «Витебский курьер» :: Хартыя'97 :: Навiны

Гаспадарчы суд Віцебскай вобласці адхіліў зыск Віцебскага домабудаўнічага камбіната аб абароне дзелавой рэпутацыі супраць недзяржаўнай газеты “Витебский курьер”, - паведаміла прэс-служба БАЖ.

Зыскоўцы сцвярджалі, што ў артыкуле “Дыктатура ўлады” былі распаўсюджаныя непраўдзівыя звесткі. У прыватнасці, яны адмаўлялі існаванне загаду генеральнага дырэктара прадпрыемства, які, паводле аўтараў публікацыі, даваў указанні “весці агітацыйную прапаганду” за “мэтазгоднасць датэрміновага галасавання і аказання падтрымкі дзейнаму прэзідэнту Аляксандру Лукашэнку”. Адказчыкі ж даводзілі ў судзе, што ў артыкуле вялася гаворка не пра вытворчую дзейнасць, а пра перадвыбарчую агітацыю на прадпрыемстве.

Прадстаўнікі домабудаўнічага камбіната засталіся незадаволеныя вынікамі суда, які адхіліў пазоў, і сказалі, што справа супраць “Витебского курьера” яшчэ не скончана. Прадстаўнікі газеты не выключаюць, што зыскоўцы будуць спрабаваць абскардзіць рашэнне.