Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Сябра Саюзу пісьменьнікаў – за кратамі 11:27, 16/05/2006
Суд Ленінскага раёну горада Менска прыгаварыў да 15 сутак адміністрацыйнага арышту Паўла Ласкутова – журналіста і сябра Саюзу беларускіх пісьменьнікаў. Першапачаткова Паўлу прад’явілі крымінальнае абвінавачваньне ў “пагрозе судзьдзям пры выкананьні службовых паўнамоцтваў”, пасьля абвінавачваньне перавялі ў разрад адміністрацыйных правапарушэньняў.
Як паведаміў www.belngo.info сам Павал, ягоная сяброўка нядаўна згубіла тэлефонную картку, зь якой, як высьветлілася, невядомы мужчына патэлефанаваў ноччу судзьдзі Тупік і сказаў: “Гэта народнае судзілішча. Вам будзе забаронены ўезд у Эўропу”.
Са слоў Паўла, падчас сьледзтва супрацоўнікі міліцыі вельмі цікавіліся яго палітычнымі поглядамі, адносінамі да ўлады, доўгі час не казалі, ў чым ён абвінавачваецца.
Міліцыянты правялі на кватэры ў П.Ласкутова вобшук толькі з адным законным панятым. На судзе не была прадстаўленая стужка запісу телефанаваньня невядомага з пагрозамі да судзьдзі, не было гукавай экспэртызы голасу. Акрамя таго, падчас паседжаньня судзьдзя падкрэсьліла, што Павел падтрымлівае бок апазыцыі, а не існуючай улады.
