Галоўнае -- пакараць :: Хартыя'97 :: Навiны

5 чэрвеня ў Жлобіне (Гомельская вобласьць) адміністрацыйная камісія раённага выканаўчага камітэта пастанавіла аштрафаваць Эдуарда Зялянкова – мясцовага маладзёвага актывіста – за налепкі “Дастаў!”. Адна жанчына з камісіі спрабавала давесьці, што калі Эдуард не расклейваў налепкі, то, прынамсі, намазваў на іх клей.

Трое мясцовых хлопцаў былі затрыманыя міліцыяй і супрацоўнікамі КДБ і абвінавачаныя ў расклейваньні налепак з надпісам “Дастаў!”. Раней штрафы ўжо былі накладзеныя на іншых з затрыманых.

“У паказаньнях іншых хлопцаў, якія былі затрыманыя, запісана, што менавіта я гэтыя налепкі не расклейваў. І пры затрыманьні ў мяне налепак не выявілі. Тое ж самае я патлумачыў на паседжаньні камісіі. Аднак участковы міліцыянт сьцьвярджаў, што я нібыта таксама іх клеіў,” -- распавядае Э. Зялянкоў.

Старшыня камісіі А. Губарэвіч сказаў, што паказаньні аднаго міліцыянта важней, чым іншых асобаў, і камісія пастанавіла аштрафаваць 22-гадовага навучэнца тэхнікума на 62000 рублёў за “распаўсюд друкаваных выданьняў, якія вырабленыя з парушэньнем вызначанага парадку і ня маюць выдавецкіх дадзеных, зьмест якіх накіраваны на прычыненьне ўрону дзяржаўнаму і грамадзкаму парадку, правам і законным інтарэсам грамадзянаў”.

На меркаваньне Эдуарда, пра ўзровень працы камісіі сьведчыць наступны факт. Хвілінаў празь 15 пасьля пачатку разгляду справы адна з кабетаў заявіла: “Кожны зь іх вінаваты: адзін трымаў налепку, другі – пэндзаль, трэці – намазваў клей.” Эдуарду давялося адказаць, што калі б жанчына больш уважліва азнаёмілася з матэрыяламі справы, яна б заўважыла, што налепкі былі самаклейныя.