Аляксандр Мілінкевіч: «Захад павінны асьцерагчы Расею» :: Хартыя'97 :: Навiны

Госьцем другой старонкі сёняшняй газэты "Rzeczpospolita" стаў Аляксандар Мілінкевіч – лідэр беларускай апазыцыі. “Захад павінны асьцерагчы Расею”, - гэтыя словы беларускага палітыка вынесеныя ў тытул. Размова тычыцца беларуска-расейскага саюзу.

Паводле журналіста газэты "Rzeczpospolita", яшчэ сёлета можна чакаць рэфэрэндуму ў справе канстытуцыі. Што мае рабіць у зьвязку з гэтым беларуская апазыцыя? Мілінкевіч кажа, што ў першую чаргу апазыцыянэры хочуць давесьці грамадзтву пагрозу, якую нясе такі рэфэрэндум.

Зрэшты, большасьць беларускага грамадзтва не падтрымлівае ідэі страты незалежнасьці. Шмат залежыць ад палітыкаў Захаду, якія не павінны прызнаць вынікаў магчымага рэфэрэндуму, бо ён будзе праведзены гэтак жа недэмакратычна, як і апошнія выбары. Захад таксама павінен асьцерагчы Расею перад правядзеньнем рэфэрэндуму аб далучэньні Беларусі. Пабудова агульнай дзяржавы насамрэч азначае аншлюз Беларусі.

Кошт незалежнасьці можа быць у чатыры разы большы, чым цяпер каштуе расейскі газ. Што пра гэта думае апазыцыя? Мілінкевіч сьцьвярджае, што беларусы ня толькі не аддадуць незалежнасьці за танны газ, але гатовыя ахвяраваць за гэта ўласнае жыцьцё.

Дэмакратыя рана ці позна ў Беларусь прыйдзе, тым чамсам як страчаная незалежнасьць можа быць вернутая толькі праз стагодзьдзі, а можа й ніколі. Таму пагроза вельмі вялікая. А газ будзе хутка дарагі і ў самой Расеі.

У сытуацыі небясьпекі страты незалежнасьці ці можа беларуская апазыцыя пачаць супрацоўнічаць з Лукашэнкам? На гэтае пытаньне Мілінкевіч адказаў так: для мяне барацьба з рэжымам не зьяўляецца самамэтаю. У гэтай барацьбе галоўнае свабодная й незалежная Беларусь. Ня бачу ніякіх праблемаў у супрацоўніцтве з Лукашэнкам. Але калі ён зьвернецца да Захаду з просьбаю аб дапамозе, пачуе тое самае, што ўжо чуў ня раз – спачатку дэмакратычныя выбары, а потым дапамога. А для Лукашэнкі вольныя дэмакратычныя выбары азначаюць паразу.

Апошні час усё больш чутно пра тое, што расьце нязгода ў шэрагах беларускай апазыцыі. Ці пагражае гэта расколам рэмакратычнай кааліцыі? Маем крызыс, прызнаецца Мілінкевіч. Палітычная канкурэнцыя існуе нават сярод кааліцыянтаў. Погляды моцна адрозьніваюцца. Цяжка сабе ўявіць, каб было іначай, бо разам сабраліся і камуністы, і сацыялісты, і лібэралы, і нацыяналісты. У такой сытуацыі цяжка захаваць адзінства. У дадатак кожны палітык мае свае амбіцыі. «Але я ня думаю, што кааліцыя разбурыцца. Цяпер мы павінны дзейнічаць. Для мяне галоўнае, каб кампанія “За свабоду” як мага хутчэй пачала дзейнічаць. Буду старацца, каб цягам месяца гэты рух меў праграму й рэгіянальныя структуры. Калі цяпер страцім палову году на дыскусыі, дык страцім увесь даробак кааліцыі. Шкада грошай і часу”, - сказаў Мілінкевіч у інтэрвію газэце "Rzeczpospolita".