Ці атрымлівае палітвязень Мікіта Сасім пошту? :: Хартыя'97 :: Навiны

Сьветлагорскія актывісты не атрымалі пацьверджаньне аб тым, што “Ліст салідарнасьці”, які быў адпраўлены зьняволенаму маладзёваму лідэру Мікіце Сасіму, сапраўды ўручаны яму. Замест паведамленьня аб уручэньні заказнога ліста пошта 10 чэрвеня даставіла пусты блянк. Ліст салідарнасьці Мікіце Сасіму, якога сусьветная праваабарончая арганізацыя “Міжнародная амністыя” аб’явіла Вязьнем сумленьня, склалі прадстаўнікі грамадзкіх і партыйных арганізацыяў, а таксама шэраг грамадзянаў Сьветлагорскага раёну.

“Прадстаўнікі грамадзкай супольнасьці, неабыякавыя жыхары г. Сьветлагорска і Сьветлагорскага раёну далучаюцца да ўсіх, хто ўжо выказаў свой пратэст супраць Вашага ўтрыманьня ў зьняволеньні. Мы таксама шчыра зычым Вам моцы духу, мужнасьці й здароўя, якія так неабходныя зараз”, – гаварыцца ў лісьце, пад якім падпісаліся 25 чалавек.

Даручэньне адправіць ліст па пошце ўзяла на сябе Натальля Бордак – сакратар рады Сьветлагорскай раённай арганізацыі грамадзкага аб’яднаньня “Таварыства беларускай мовы імя Францішка Скарыны”. Ліст быў адасланы на адрас: вул. Брэсцкая, д. 258А, СІЗА № 6, камэра № 54, г. Баранавічы, Брэсцкая вобласьць, 225320.

10 чэрвеня паштальён прынесла Н. Бордак паведамленьне аб дастаўцы ліста адрасату. “Аднак гэта быў пусты блянк з паштовымі штэмпелямі. Ні даты атрыманьня, ні подпісу адрасату на ім не было – увогуле, ніякіх адзнакаў аб тым, што М. Сасім атрымаў ліст. Таму я не прыняла гэтае паведамленьне. Мы хочам мець пэўнасьць, што ліст дайшоў. Паштальён сказала, што блянк будзе паўторна накіраваны ў Баранавічы” – паведаміла Н. Бордак www.belngo.info.