«Витебский курьер» выклікалі ў суд :: Хартыя'97 :: Навiны

Сёння ў Кастрычніцкім судзе Віцебска будзе разглядацца зыск да мясцовай недзяржаўнай газеты "Витебский курьер М". З заявай аб абароне гонару і дзелавой рэпутацыі да газеты звярнуўся віцяблянін Аляксандр Данілаў.

Як паведамляе прэс-служба БАЖ, прычына зыску -- артыкул у нумары ад 14 красавіка 2006 года "Плошча Свабоды для вузкага кола асоб", ў якім аўтар выказвае меркаванне, што рашэнне гарвыканкама аб адводзе зямельнага ўчастка грамадзяніну А. Данілаву для будаўніцтва Цэнтра моладзевага адпачынку скараспелае і прынятае насуперак закону: "Ні публічнага конкурсу праекта, ні тэндэру сярод падрадчыкаў. Усё неяк цішком, загадкава".

Ісцец лічыць, што аўтар артыкула наўмысна праводзіць думку аб тым, што ён (А.Данілаў) насуперак патрабаванням закону, выкарыстоўваючы сваяцкія сувязі і асабістае знаёмства са старшынёй гарвыканкама, незаконна атрымаў рашэнне аб адводзе зямлі для будаўніцтва Цэнтра на месцы, дзе раней знаходзіўся кафедральны сабор Св. Мікалая.

А.Данілаў сцвярджае ў зыску, што гэтыя звесткі не адпавядаюць рэчаіснасці, а тон артыкула і рубрыкі "Скандал", у якой ён размешчаны, зневажаюць яго гонар і дзелавую рэпутацыю. Ён патрабуе абвергнуць інфармацыю, а свой маральны ўрон ацэньвае ў 30 мільёнаў рублёў.