Акцыя супраць прымусовай падпіскі на «Советскую Белоруссию» :: Хартыя'97 :: Навiны

Сацыял-дэмакраты Аляксей Сабасцян і Язэп Палубятка правялі ў г. Масты акцыю пратэсту супраць прымусовай падпіскі насельніцтва на газету “Советская Белоруссия”.

6 верасня ў адным з паштовых аддзяленняў горада павінна была адбыцца сустрэча падпісчыкаў з супрацоўнікамі рэдакцыі. Каб завабіць патэнцыйных падпісчыкаў, тут жа павінен быў адбыцца розыгрыш прызу — мабільнага тэлефона. У назначаны час сюды прыйшло каля дзесятка пенсіянераў, у тым ліку былы пракурор раёна і былы другі сакратар райкаму кампартыі. Яны таксама мелі намер паўдзельнічаць у розыгрышы. Па службовых абавязках сюды з’явілася пяць супрацоўнікаў райвыканкаму, начале з кіраўніком ідэалагічнага аддзела. Прысутнічала каля дзесятка кіраўніўкоў гарадскіх арганізацый. Здавалася, што праводзіць нейкую акцыю сярод тых, хто не чытае ніякай прэсы, акрамя “СБ”, і тых, хто прымушае сваіх падначаленых падпісвацца на яе, не мае сэнсу. Аднак яна адбылася.

Напачатку Язэп Палубятка, апрануты ў чырвоную майку з выяваю палітвязня Александра Казуліна, распавёў прысутным пра заганны стыль артыкулаў газеты і прымусовыя метады падпіскі на яе. Затым звярнуўся да супрацоўнікаў рэдакцыі з запытаннем: “Дзе матэрыялы пра Аляксандра Казуліна?” Пасля чаго ён паказваў першую старонку “СБ” прысутным, ірваў яе і кідаў на падлогу. Паспрабавалі спыніць акцыю пратэсту начальнік раённага аддзялення “Белпошта” і начальнік штабу РАУС, які таксама прыйшоў сюды, каб займець мабільны тэлефон. Аднак спробы былі безвыніковыя. Пасля таго, як былі знішчаны набытыя ў шапіку экзапляры “СБ”, прысутным былі раздадзены календарыкі з партрэтам Казуліна. Пасля чаго Палубятка разарваў некалькі рэкламных экзэмляраў газеты, прывезеных сюды супрацоўнікамі рэдакцыі, і шматкі кінуў у сметніцу.

Арганізатарам імпрэзы давялося выклікаць нарад міліцыі, і толькі пасля таго, як прыехалі ахоўнікі “парадку”, пратэстанты пакінулі памяшканне. Міліцыя не праводзіла затрымання, а дала магчымасць ім спакойна сысці.