Валеры Дранчук: «Вялікі джынсавы фэст» – дыямэнт гэтай восені :: Хартыя'97 :: Навiны

“Фэст пацьвердзіў, што “джынсавы” складнік дэмакратычнага руху ня толькі адметны і нечаканы, але змястоўны й прадуктыўны. Тут не адно добрая духовасьць, але і эстэтыка, і васільковасьць беларушчыны, і традыцыйны ўзор накшталт беларускага палатна. Мне ад самага пачатку, калі толькі-толькі пайшло на колер беларускай рэвалюцыі, гэтая ідэя вельмі спадабалася. Я не разумеў тады скептыкаў, якіх аказалася аж зашмат. І справа ня толькі ў тым, што джынсы блізкія да нашых зрэбнікаў, нашай кудзелі, -- гэта яшчэ як падхопяць дызайнеры і мадысты, вось пабачыце! – але ў прыгожым эпізодзе з хронікі супраціву: калі маладзён падняў над сабой сцяг-кашулю. Гэта ўжо сюжэт гісторыі – і якой гісторыі! Словам, я бачу тут дыямэнт. І вось заўчорашні фэст – таксама дыямэнт гэтай восені, лепш сказаць, выдатная абалонка з дыямэнтам у сярэдзіне”, -- заявіў Валеры Дранчук – беларускі эколаг, журналіст і бацька палітвязня, актывіста грамадзянскай ініцыятывы па назіраньню за выбарамі “Партнэрства” Цімафея Дранчука, каментуючы акцыю “Вялікі джынсавы фэст”, якая адбылася ў Менску 16 верасня.

“Яшчэ -- спроба залабадзённай інтэрпрэтацыі. Першая спроба. У пачатку – несумненна ўдалага – лічу, вялікія персьпектывы. Апушчу мноства дэталяў, скажу толькі, што фэст будзе мець свой маляўнічы працяг, яго будзе чакаць моладзь і на фэст пачне зьяжджацца сьвет. Гэта будзе ДАЛУЧЭНЬНЕ ДА БЕЛАРУСІ І БЕЛАРУШЧЫНЫ, насуперак усялякім параноікам антыбеларушчыны з іхнім “недалучэньнем”, -- упэўнены Валеры Дранчук.