Ежы Гедройць: культура й палітыка :: Хартыя'97 :: Навiны

У бібліятэцы Варшаўскага ўнівэрсытэту адбываецца міжнародная навуковая канфэрэнцыя “Ежы Гедройць: культура й палітыка 20-га стагодзьдзя”. Сустрэча праходзіць з нагоды 100-й гадавіны нараджэньня вядомага эміграцыйнага дзеяча, які, між іншым, нарадзіўся ў Менску.

Цягам трох дзён у Варшаўскім унівэрсытэце будуць сустракацца палітыкі, куртуролягі, філёзафы, журналісты ды гісторыкі з розных краінаў Эўропы, каб паспрабаваць ацаніць уклад Ежы Гедройця ў гісторыю Ўсходняй Эўропы, а таксама ягоную спадчыну. Урачыстае адкрыцьцё адбылося з удзелам Міністра культуры Польшчы Казімежа Міхала Ўяздоўскага, які зачытаў вітальны ліст ад прэзыдэнта краіны.

Першая частка канфэрэнцыі была прысьвечана значэньню палітычнай канцэпцыі Ежы Гедройця. З дакладам на гэтую тэму выступіў былы міністар замежных справаў Польшчы Ўладыслаў Барташэўскі. Пазьней адбылося ўрачыстае адкрыцьцё памятнай шыльды, прысьвечанай Гедройцю.

Другая частка прайшла пад назовам "Сярод сяброў і суседзяў." У ёй узялі ўдзел гісторыкі й палітыкі зь Летувы, Украіны й Беларусі. Беларускі бок прадставілі Станіслаў Шушкевіч ды Лявон Баршчэўскі. Падчас прамовы прафэсар Шушкевіч зазначыў, што ідэі Ежы Гедройця з прыходам дэмакратычнай і прабеларускай улады абавязкова будуць рэалізаваныя ў нашай краіне. Ганаровы старшыня ПЭН-цэнтру Лявон Баршчэўскі падкрэсьліў, што ў пасьляваенны час ніхто так не адстойваў інтарэсаў Беларусі ў Заходняй Эўропе як Ежы Гедройць.

Канфэрэнцыя будзе адбывацца да серады. Будзе адчынена выстава, прысьвечаная Ежы Гедройцю, а таксама адбудзецца больш за 20 выступаў гасьцей сустрэчы, паведамляе “Радыё Палонія”.