Палітвязня Цімафея Дранчука перавялі ў мінскую калонію :: Хартыя'97 :: Навiны

Актывіста грамадскай ініцыятывы па назіранню за выбарамі "Партнёрства" Цімафея Дранчука перавялі з следчага ізалятара ГУУС Мінгарвыканкама, дзе ён утрымліваўся апошнія месяцы, у менскую калонію №1, дзе раней адбывалі пакаранне палітвязні Міхаіл Марыніч, Андрэй Клімаў, Аляксандр Васільеў і іншыя апазіцыянеры. Аб гэтым прэсс-цэнтру Хартыі`97 паведаміў бацька палітвязня Валерый Дранчук.

Нагадаем, што Цімафей Дранчук 4 жніўня был асуджаны судом Цэнтральнага раёна да аднаго году пазбаўлення волі ў калоніі агульнага рэжыму. Актывіста "Партнёрства" абвінавацілі ў парушэнні ст. 193 Крымінальнага кодэксу - "выступленне ад асобы незарэгістраванай арганізацыі". Гаворка ідзе аб «палітычных» папраўках у Крымінальны кодэкс, занесеных напярэдадні прэзідэнцкіх выбараў.

У апошнім лісце дахаты Цімафей Дранчук паведамляў, што ў СІЗА яго ўтрымоўваюць у перанаселенай камеры, і ў яго рэзка пагоршыўся зрок.

Нагадаем, што гэта далёка не першы выпадак пагаршэння здароўя палітвязняў у турмах. Адвакаты і сваякі экс-кандыдата ў прэзідэнты Беларусі Аляксандра Казуліна ўвесь час паведамляюць аб пагаршэнні стану здароўя палітвязня - ў яго з`явіліся праблемы з сэрцам і ныркамі.

У сакавіку 2005 года палітвязень Міхаіл Марыніч перанёс інсульт у Аршанскай калоніі. Толькі дзякуючы ўмяшанню беларускай і міжнароднай грамадскасці, якая правяла шматлікія акцыі пратэсту, Марыніча шпіталізавалі ў Рэспубліканскі турэмны шпіталь. Аднак пасля выхаду з турмы Марыніч беззваротна страціў здароўе.