Супрацоўнікі КДБ дапытваюць студэнтаў :: Хартыя'97 :: Навiны

У Гомелі перасьледу падвергліся грамадзкія актывісты Вольга Буранкова і Сяргей Палуян. Прафілактычныя гутаркі з імі спрабавалі весьці супрацоўнікі Упраўлення КДБ па Гомельскай вобласьці.

Як паведамляе сайт гомельскай грамадзкай арганізацыі “Гарт”, напярэдадні Сяргея Палуяна, які навучаецца ў Гомельскім дзяржаўным унівэрсытэце імя Ф.Скарыны, выклікалі да ўнівэрсытэцкага ваенкому нібыта выправіць нейкія хібы ў дакумэнтах. Падчас гэтага наведваньня студэнту прапанавалі прайсьці ў кабінет на чацьвёртым паверсе галоўнага ўнівэрсытэцкага корпусу з красамоўнаю шыльдаю "Сьпецадзьдзел". Тут маладзёна ўжо чакаў чалавек, які назваўся супрацоўнікам Камітэта дзяржбясьпекі.

Супрацоўнік пачаў цікавіцца мейсцам працы бацькоў студэнта, задаў некалькі агульных пытаньняў. Пасьля гэтага ён пачаў пытацца пра ўдзел Сяргея ў штомесяцовых акцыях салідарнасьці са зьніклымі палітыкамі і палітзьняволенымі. Зразумеўшы, што нармалёвае размовы не адбудзецца і аніякіх фактаў у верасьнёвую справаздачу дадаць не атрымаецца, пільны супрацоўнік КДБ размову скончыў.

Наступнай была дапытана актывістка Вольга Буранкова. Выставіўшы за дзьверы дэкана матэматычнага факультэта Аляксандра Жогаля, супрацоўнік КДБ галянтна прапанаваў дзяўчыне прысесьці і назваўся Дзьмітрыем Іваненкам. Чэкіст аднак адмовіўся паказаць сваё пасьведчаньне. У адказ актывістка ўзьнялася ды выйшла з памяшканьня, спасылаючыся, што ня гутарыць зь незнаёмымі. Гэтым студэнтка надта зьдзівіла дэкана, які чакаў у калідоры.