Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Мілінкевіч правёў шэраг міжнародных сустрэч 13:13, 04/10/2006
Лідэр аб’яднаных дэмакратычных сіл Беларусі Аляксандр Мілінкевіч сустрэўся 3 кастрычніка ў Мінску з Пэрам Карлсанам, амбасадарам Каралеўства Даніі ў Расіі, акрэдытаваным па сумяшчальніцтве ў Рэспубліцы Беларусь.
У размове былі закранутыя пытанні бягучай палітычнай сітуацыі ў Беларусі, становішча палітычных зняволеных і перспектываў канкрэтных крокаў Еўропы ў справе дэмакратызацыі Беларусі, а таксама стварэння супольных ініцыятываў, маральна і палітычна падтрымліваючых дэмакратычныя сілы Беларусі ў іх імкненні да свабоды і дэмакратыі.
Аляксандр Мілінкевіч адзначыў, што сённяшнія спробы еўрапейскіх краін дапамагаць дэмакратычным сілам Беларусі ёсць для Еўропы “безумоўным крокам наперад, але казаць пра большую эфектыўнасць можна будзе толькі тады, калі Еўропа выпрацуе канкрэтную палітыку супрацоўніцтва з Беларуссю і грамадзянскай супольнасцю ў Беларусі”.
Учора ж адбыліся таксама перамовы Аляксандра Мілінкевіча з Эрыкам Джойсам, членам парламенту Брытаніі ад партыі “лейбарыстаў” і парламенцкім сакратаром дзяржаўнага Міністра гандлю і прамысловасці Вялікай Брытаніі. Падчас сустрэчы палітыкі абмяняліся думкамі, што да існуючай палітычнай сітуацыі ў Беларусі і перспектываў супрацоўніцтва на ўзроўні палітычных партый і грамадскіх ініцыятываў.
