Беларускае МЗС не зразумела нямецкага амбасадара :: Хартыя'97 :: Навiны

МЗС Беларусі лічыць некарэктнымі выказванні амбасадара Нямеччыны Мартына Хекера пра нібыта наяўныя складанасці ў атрыманні беларускіх віз, заявіў на брыфінгу кіраўнік управы інфармацыі МЗС Беларусі Андрэй Папоў.

Па яго словах, М. Хекер зрабіў адпаведную заяву на прэс-канферэнцыі 2 кастрычніка ў Менску.

"Выказванні амбасадара Нямеччыны намі ўспрынятыя як вельмі дзіўныя сэнтэнцыі", - адзначыў А. Папоў. Ён падкрэсліў, што беларускі бок выступае і працягвае выступаць за маскімальнае спрашчэнне візавага рэжыму паміж двумя краінамі. З 1 кастрычніка 2004 года для ўезду ў Беларусь няма неабходнасці мець запрашэнне для грамадзян ЕЗ па гасцёвой і дзелавой візе. Па турыстычнай візе прадстаўленая магчымасць двухразовага ўезду ў Беларусь. Акрамя таго, Беларусь прапануе спрасціць візавыя фармальнасці для асобных катэгорый грамадзян - студэнтаў, пенсіянераў - і гатова адчыніць дадатковыя консульскія пункты ў Мюнхене і Гамбургу, растлумачыў ён.

"Аднак гэтыя прапановы не падтрыманыя Нямеччынай", - канстатаваў афіцыйны прадстаўнік МЗС.

Па словах А. Папова, у МЗС таксама выклікалі здзіўленне дадзеныя амбасадара Нямеччыны аб колькасці выдадзеных грамадзянам Нямеччыны ўязных віз у Беларусь. "Па словах амбасадара, Беларусь выдае не больш 5 тысяч віз за год для нямецкіх грамадзян. У той жа час фактычна ў 2006 годзе выдадзена 36 тысяч віз, у тым ліку 10 тысяч турыстычных, а за 9 месяцаў цяперашняга года - 29 тысяч віз грамадзянам Нямеччыны".

А. Папоў таксама назваў "незразумелымі выказванні амбасадара, дзе ён не раіць прыязджаць у Беларусь".