Аляксандр Ярашук: «Зварот за дапамогаю да Лукашэнкі яшчэ раз пацвердзіў залежнасць ФПБ ад улады» :: Хартыя'97 :: Навiны

"Нават, калі на гэтым радыё і адбываецца забастоўка, то ў гэтым няма нічога дзіўнага. Я маю на ўвазе парадкі, якія там усталяваныя, калі людзей прымушаюць працаваць у жорсткам ідэялагічным рэчышчы. Любы журналіст, які хоць трохі сябе паважае, павінен быў бы рэагаваць. Аднак, гэтае радыё цалкам афіцыёзнае, там пануе такі жа валюнтарызм, як у цэлым у Федэрацыі прафсаюзаў Беларусі. Калі гэтыя журналісты ішлі працаваць на радыё ФПБ, яны павінны былі разумець, што ФПБ – не самастойная арганізацыя. Толькі вар`ят будзе скардзіцца прэзідэнту, працуючы ў грамадскай арганізацыі. Яны папросту паскардзіліся свайму галоўнаму гаспадару, які мае ўладу над старшынёй федэрацыі Леанідам Козікам. Зварот за дапамогай да Лукашэнкі яшчэ раз пацвердзіў залежнасць ФПБ ад улады", – заявіў лідэр Беларускага кангрэсу дэмакратычных прафсаюзаў Аляксандр Ярашук, каментуя прэс-цэнтру Хартыі`97 інфармацыю пра абвяшчэнне журналістамі "Новага радыё" забастоўкі.

Радыё Федэрацыі прафсаюзаў Беларусі сёння раніцай у прамым эфіры абвясціла забастоўку. Прыкладна ў восем раніцы музыкальны блок "Новага радыё" перапыніўся заявай, у якой супрацоўнікі звярнуліся да Аляксандра Лукашэнкі з просьбай абараніць іх ад самаўпраўнасці з боку кіраўніцтва ФПБ.