Жанна Літвіна: «Мы ўпершыню сутыкнуліся з праяваю пазіцыі калектыва дзяржаўнага СМІ» :: Хартыя'97 :: Навiны

"Упершыню, магчыма, мы сутыкнуліся з праявай пазіцыі рэдакцыйнага калектыву дзяржаўнага СМІ. Мяне заўсёды дзівілі пакорлівасць, маўклівасць і інэртнасць маіх калегаў, калі па дачыненні да іх здзяйснялася самаўпраўнасць. Бяздзейнасць тэлевізійных журналістаў, калі іх масава звальнялі, маўчанне журналістаў "Народнай газеты", калі ў іх па ўказу зверху змянілі рэдактара. Журналісцае грамадства было маўклівым. І сёння адна з галоўных праблемаў - мы губляем прафесію журналіста. Журналісты дзяржаўных СМІ ператвараюцца ў ідэолагаў і прапагандыстаў, удзельнічаюць у палітычных правакацыях супраць апазіцыі. Журналістам "Новага радыё", якія сёння выказалі пратэст, я жадаю перамагчы. Галоўнае, каб яны памяталі, што іх, вядома, можна зволіць, можна зачыніць радыёстанцыю, але нельга пазбавіць прафесіі", - заявіла старшыня Беларускай асацыяцыі журналістаў, былы кіраўнік зачыненага ўладамі радыё "101,2" Жанна Літвіна, каментуя прэс-цэнтру Хартыі` 97 абвешчаную сёння журналістамі "Новага радыё" забастоўку.

Нагадаем, што радыё Федэрацыі прафсаюзаў Беларусі сёння раніцай у прамым эфіры абвясціла забастоўку. Прыкладна ў восем раніцы музыкальны блок "Новага радыё" перапыніўся заявай, у якой супрацоўнікі звярнуліся да Аляксандра Лукашэнкі з просьбай абараніць іх ад самаўпраўнасці з боку кіраўніцтва ФПБ. У інфармацыйнай службе радыё прэс-службе Хартыі`97 адмовіліся каментаваць сітуацыю з забастоўкай, нярвозна заявіўшы, што "усё ў парадку". Было таксама сказана, што раніцай у радыёстанцыі былі "тэхнічныя праблемы".