Ніл Гілевіч: «Я далучаю свой голас у падтрымку Змитера Дашкевіча» :: Хартыя'97 :: Навiны

Народны паэт Беларусі Ніл Гілевіч перадаў лідэру "Маладога Фронту", палітвязню Зміцеру Дашкевічу сваю кнігу "Толькі мы самі". Ён папрасіў маладафронтаўцаў перадаць яе ў менскі СІЗА на вуліцы Валадарскага, куды быў зняволены іх лідэр. У кнізе надрукаваныя публіцыстычныя артыкулы, прамовы і інтэрв`ю паэта за апошнія 10 гадоў.

– Я не раз і ў артыкулах, і ў вершах выяўляў сваю падтрымку нашай моладзі, якая дамагаецца, каб у Беларусі перамагла справядлівасць, праўда, культура і закон, перад якім усё павінны быць роўныя. Сёння я далучаю свой голас у падтрымку Зміцера Дашкевіча, – адзначыў Ніл Гілевіч у інтэрв`ю прэс-службе АГП. – Неабходна, каб як мага больш людзей усвядомілі, што маладафронтаўцы і ўсе іншыя людзі, у каго першым чынам ёсць сумленне, не могуць змірыцца з арыштам Зміцера. І з гэтым нельга мірыцца.

Трэба як мага больш гаварыць у сродках масавай інфармацыі аб Дашкевічы і аб тым, чаму яго кінулі ў турму. Як мага шырэй ахапіць гэтай інфармацыяй людзей і пераконваць тых, хто яшчэ сёння сумняваецца і па наіўнасці на нешта спадзяецца, што трэба дзейнічаць.

Сапраўды, што інкрымінуецца Дашкевічу? Культурны, інтэлігентны малады чалавек, прычым з хрысціянскай душой, проста не жадае жыць далей так, як яго прымушаюць. Ён змагаўся за нармалёвыя чалавечыя правы. І пэўна за тое, каб была зарэгістраваная арганізацыя Малады Фронт. Няма ніякіх падстаў хапляць і саджаць яго за гэта. Як і Казуліна. А у чым Казулін вінаваты? Уся яго віна ў тым, што ён сказаў праўду з тэлеэкрана. Але такую праўду, якая далёка не ўсім спадабалася. Яна і не магла спадабацца.

Улады баяцца актыўных грамадзян, асабліва маладых. Нядаўна "Свабода" паўтарыла мой верш "Кліч да беларускай моладзі". Ён сканчаецца словамі: "Толькі ты зберажэш Беларусь, Толькі ты, беларуская моладзь!".

Трэба, каб справа Дашкевіча выклікала як мага большы рэзананс. Неабходна паказаць, наколькі несправядлівая, бессэнсоўная і нялюдская ўся гэтая акцыя па яго затрыманню і зняволенню ў СІЗА, – адзначыў паэт.