Вырашаецца лёс Паўла Красоўскага :: Хартыя'97 :: Навiны

Сустрэча сьледчых з затрыманым маладзёвым актывістам Паўлам Красоўскім прызначаная на 10 кастрычніка а 14 гадзіне. Падчас яе вырашаць, ці па справе віцебскіх выбухаў утрымліваць моладзевага актывіста і надалей за кратамі ізалятару часовага ўтрыманьня, ці зьмяніць меру на іншую. Пра гэта “Радыё Рацыя” паведаміў прадстаўнік праваабарончага цэнтру “Вясна” Леанід Сьвецік. Таксама ён інфармаваў, што інтарэсы Красоўскага разам зь менскім адвакатам Паўлам Сапёлкам пачаў абараняць яшчэ і віцебскі адвакат Вячаслаў Праскаловіч.

Зроблена гэта дзеля таго, каб падабаронны ў любы момант мог атрымаць кваліфікаваную юрыдычную дапамогу. Праскаловіч ужо наладзіў сталую сувязь са сьледчымі. Ёсьць спадзяваньне, што затрыманаму можна будзе перадаць некаторыя неабходныя рэчы ды прадукты, безь якіх яму прыйшлося перакідвацца мінулыя выходныя.

Каб падтрымаць Красоўскага, да яго прыяжджае маці, якая катэгарычна абвяргае магчымасьць удзелу сына ў гэткім злачынстве. Абвінавачаньне Тамара Красоўская назвала “фарсам і дзікунствам”. Тым больш, яно не стасуецца з тым, што падчас выбухаў у Віцебску моладзевы актывіст знаходзіўся за мяжой.

Пра закрыцьцё справы ў адносінах да Красоўскага ні праваабаронцы, ні адвакаты пакуль размовы не вядуць, хаця і спадзяюцца на гэта.

Павал Красоўскі быў затрыманы некалькі дзён таму. Яго падазраюць у арганізацыі выбухаў у Віцебску ў мінулым годзе. Актывісту пагражае смяротная кара.