Уступілі ў сілу папраўкі ў Выбарчы кодэкс :: Хартыя'97 :: Навiны

Выбары дэпутатаў мясцовых Саветаў пройдуць па новым выбарчым заканадаўстве. Адпаведныя папраўкі ўступілі ў сілу з 10 кастрычніка, у адзін дзень з падпісаннем Аляксандрам Лукашэнка указу аб прызначэнні мясцовых выбараў на 14 студзеня 2007 года. Найболей істотным новаўвядзеннем з`яўляецца змена парадку абрання дэпутатаў мясцовых Саветаў. У прыватнасці, законапраектам прадугледжваецца пераход ад мажарытарнай сістэмы абсалютнай большасці да сістэмы адноснай большасці. Гэта значыць, што мясцовыя выбары будуць праводзіцца ў адзін тур. А пераможцам стане кандыдат, які набраў больш за ўсіх галасоў.

Законапраектам змяняецца парадак правядзення сустрэч кандыдатаў з выбаршчыкамі. З гэтага часу сходы, якія арганізуюцца па-за памяшканнямі, мэтай якіх з`яўляецца агітацыя, будуць аднесеныя да кампетэнцыі закона "Аб масавых мерапрыемствах". Для арганізацыі сустрэч з выбаршчыкамі кандыдату неабходна будзе атрымаць дазвол мясцовай выканаўчай і распарадчай улады. Разглядаць заяўкі кандыдатаў на правядзенне сустрэч з выбаршчыкамі яны абавязаныя не пазней трох дзён з моманту іх падачы. Зносіны з выбаршчыкамі могуць адбывацца толькі ў спецыяльна адведзеных месцах, паведамляе БелаПАН.

У законапраекце змяшчаецца забарона на выраб друкаванай агітацыйнай прадукцыі за межамі краіны, а таксама пашыраны круг суб`ектаў, якія могуць быць пакараныя за парушэнне выбарчага заканадаўства. Апрача кандыдатаў у прэзідэнты і дэпутаты з выбараў могуць быць знятыя і асобы, якія высоўваюцца кандыдатамі. Прыцягненне ўдзельнікамі выбарчага працэсу замежнай дапамогі таксама будзе карацца адменай рэгістрацыі.

Законапраектам з 10 да 5 дзён да выбараў скарачаецца тэрмін забароны на публікацыю ў СМІ апытанняў грамадскай думкі.

Акрамя таго, Выбарчы кодэкс і закон "Аб прэзідэнце Рэспублікі Беларусь" прыводзяцца ў адпаведнасць з новай рэдакцыяй Канстытуцыі. З іх выключаюцца палажэнні, якія абмяжоўваюць двума тэрмінамі магчымасць займання пасады прэзідэнта адной і той жа асобай.

У часткі правядзення мясцовых рэферэндумаў законапраектам забаронена выносіць на іх пытанні, якія ўрэгуляваныя рэспубліканскім заканадаўствам.

Прыняцце дадзенага законапраекта дазволіць зэканоміць на мясцовых выбарах каля 6 мільярдаў рублёў. Сама ж выбарчая кампанія абыйдзецца падаткаплацельшчыкам у 28,5 мільярда рублёў.