Менскія ўлады ігнаруюць галадоўку пратэстантаў :: Хартыя'97 :: Навiны

Менскія гарадскія ўлады дагэтуль не адрэагавалі на галадоўку 132 веруючых пратэстанцкай царквы "Новае жыццё", нягледзячы на тое, што царква яшчэ 6 кастрычніка накіравала ў Менгарвыканкам заяву аб пачатку галадоўкі пратэсту. Аб гэтым прэс-цэнтру Хартыі`97 паведаміла прэс-сакратар царквы "Новае жыццё" Іна Давыдовіч.

Нагадаем, што у галадоўцы пратэсту, якая праходзіць з 6 кастрычніка ў Менску, прымаюць удзел ужо 132 веруючых царквы "Новае жыццё". Людзі прыязджаюць абараняць царкву з Мозыра, Дзяржынску, Стоўпцаў, Жодзіна. Некалькі дзесяткаў чалавек сёння правялі ноч у будынку царквы. Ва ўчорашнім набажэнстве прынялі ўдзел 500 чалавек.

Пра пачатак акцыі пратэсту супраць дзеянняў Мінгарвыканкама – бестэрміновай галадоўцы – пратэстанты абвясцілі 6 кастрычніка. Было таксама вырашана праводзіць штодзённыя малітоўныя служэнні, а таксама арганізаваць мітынг пратэсту ў Менску на плошчы Бангалор 21 кастрычніка, заяўка на правядзенне якога была пададзеная 3 кастрычніка.

"Новае жыццё" падтрымалі хрысціяне іншых канфесій. Большасць пастараў поўнаевангельскіх цэркваў выявілі жаданне ўдзельнічаць у акцыях пратэсту, а іх у Беларусі каля 60.

21 ліпеня гаспадарчы суд Менску абавязаў царкву "Новае жыццё" прадаць будынак царквы на вул. Кавалёва, 72 Мінгарвыканкаму за 17 тысяч даляраў і вызваліць памяшканне да 8 кастрычніка.