Нобелеўскую прэмію па літаратуры атрымаў турэцкі пісьменнік :: Хартыя'97 :: Навiны

У Швецыі названа імя лаўрэата Нобелеўскай прэміі па літаратуры за 2006 год. Ім стаў турэцкі пісьменнік Архан Памук за "пошук душы свайго меланхалічнага горада".

Архан Памук (нарадзіўся 7 чэрвеня 1952 у Стамбуле) – сучасны турэцкі пісьменнік, прадстаўнік постмадэрнізму, лаўрэат некалькіх турэцкіх літаратурных прэмій. Папулярны як у Турэччыне, так і за мяжой, яго творы былі перакладзеныя больш чым на 40 моў, паведамляецца на сайце Wikipedia.

Пісьменнік не хавае сваёй грамадзянскай пазіцыі ў сувязі з армянскім генацыдам і дыскрымінацыяй курдаў у Турэччыне, у сувязі з чым турэцкі ўрад падаў на яго ў суд.

Асноўныя тэмы творчасці пісьменніка – канфлікт і супрацьстаянне паміж усходам і захадам, ісламам і хрысціянствам, традыцыямі і сучаснасццю. Напрыклад, канфлікт паміж заходніцтвам і ісламізмам у сучаснай Турэччыне з`яўляецца галоўнай тэмай кнігі "Снег", якая выйшла ў 2002 годзе.

Нагадаем, што ў спісе кандыдатаў на атрыманне гэтай самай прэстыжнай міжнароднай узнагароды былі два беларускіх прадстаўніка: Святлана Алексіевіч і народны паэт Беларусі Рыгор Барадулін.

Па прадстаўленню Швецкага ПЭН-цэнтру С.Алексіевіч з 2002 года намінуецца на Нобелеўскую прэмію за цыкл сваіх твораў ("У войны – не женское лицо", "Цинковые мальчики", "Зачарованные смертью", "Последние свидетели" и "Чернобыльская молитва"). Р.Барадулін на суісканне прэміі прадстаўлены ў 2006 годзе кнігай духоўнай паэзіі "Ксты". У зборнік увайшлі яго вядомыя паэтычныя цыклы ("Бетлеемам стане сэрца", "Босая зорка", "На ўскрайку вечнасці", "З застрэшша мамінае хаты", "Каб на зямлі жыццю цяплей было", "З лістоў да Васіля Быкава"), а таксама апошнія творы, сярод якіх "Рымскі дыпціх. Узрушэнне", прысвечаны папе рымскаму Яну Паўлу ІІ. Кандыдатура Р.Барадуліна высунутая вядомым грамадскім дзеячом, настаяцелем Менскага касцёла святых Сімеона і Алены Уладзіславам Завальнюком пры падтрымцы рады Саюза беларускіх пісьменнткаў, Беларускага і Расейскага ПЭН-цэнтраў і шэрагу іншых арганізацый.