Старшыня Еўракамісіі заклікаў заняць жорсткую пазіцыю ў дачыненні да Пуціна :: Хартыя'97 :: Навiны

Старшыня Еўракамісіі Жазэ Мануэль Барозу ў панядзелак заклікаў Еўразвяз на нефармальным саміце ЕЗ-РФ, які мае быць у Фінляндыі, заняць жорсткую пазіцыю ў дачыненні да прэзідэнта Расеі па праблеме Грузіі, забойству Ганны Паліткоўскай і энергетычнай бяспекі.

Неабходна, падкрэсліў гэты высокапастаўлены еўрапейскі службоўца, каб "забойцы Паліткоўскай паўсталі перад правасуддзем". Раней Барозу ўжо абяцаў падняць пыанне забойства Паліткоўскай на сваёй сустрэчы з прэзідэнтам Расеі Уладзімірам Пуціным, дадаўшы, што гэта павінна быць "адкрытая гутарка".

Барозу абяцаў таксама падняць перад кіраўніцтвам Расеі пытанне аб ратыфікацыі еўрапейскай Энергетычнай хартыі. Гэты дакумент прадугледжвае, у прыватнасці, падаванне доступу кампаніям з Еўропы да расейскіх газа- і нафтаправодаў, паведамляе "Інтэрфакс". Старшыня Еўрапейскай камісіі падкрэсліў: "Я не жадаю выяўляць канфрантацыйнасць з Расеяй, аднак мяркую, што, толькі выказваючы нашыя прынцыпы, мы можам дасягнуць лепшых вынікаў у адносінах з Расеяй".

Барозу прызнаў несупадзенне поглядаў асобных дзяржаў, якія ўтвараюць Еўрапейскі звяз, у дачыненні да таго, каб "накіраваць адзінае пасланне Расеі", у тым ліку і адносна напружанасці, якая ўзнікла паміж Расеяй і Грузіяй.

На пытанне аб перспектывах прыёму Украіны ў ЕЗ, ён адказаў, што з гэтай краінай "трэба праводзіць нейкую разнавіднасць палітыкі еўрапейскага добрасуседства", якая спрыяла бы ўмацаванню супрацоўніцтва.

Нефармальны саміт Расея-ЕЗ вызначаны на пятніцу ў Фінляндыі, якая старшынствуе да канца гэтага года ў Саюзе.