Прафсаюзная актывістка з Бабруйска галадае больш за два тыдні :: Хартыя'97 :: Навiны

Кіраўнікі Беларускага Кангрэса дэмакратычных прафсаюзаў 16 кастрычніка прыехалі ў Бабруйск, каб наведаць Алену Захожую, намесніка старшыні першаснай арганізацыі Беларускага незалежнага прафсаюза (БНП) працаўнікоў ААТ "Белшына", якая 15-ты дзень галадае ў знак пратэсту супраць парушэння правоў сяброў незалежнага прафсаюза. 54-гадовая жанчына гатовая ісці да канца. Яна заявіла, што будзе галадаць, пакуль яе патрабаванні – рэгістрацыя пяршоўкі і выплата прэмій і даплат сябрам БНП – не будуць выкананыя. Дагэтуль ніхто з прадстаўнікоў арганізацыі прадпрыемства і канцэрна "Белнафтахім" ніяк не вызначыў сваю пазіцыю ў дачыненні да акцыі прафсаюзнай актывісткі.

"Алена Паўлаўна ўразіла нас сваім невычэрпным аптымізмам. Па яе паводзінах нават не верыцца, што яна падвергнула сябе такому жорсткаму выпрабаванню. Гэта выключна моцны духам чалавек, – распавядае на сайце БКДП (www.bcdtu.org) старшыня Кангрэсу Аляксандр Ярашук. – Аднак мы ўсе вельмі заклапочаныя станам яе здароўя. Хочацца верыць, што тыя, па віне каго гэтая жанчына вырашыла пайсці на гэты адчайны крок, нарэшце-ткі адэкватна адрэагуюць і адновяць правы незалежнага прафсаюза на прадпрыемстве. Спадзяемся, што гэтаму паспрыяе і акцыя міжнароднай прафсаюзнай салідарнасці, якую арганізаваў БКДП".

Лісты пратэсту на адрас кіраўніцтва ААТ "Белшына", гарадскіх улад і канцэрна "Белнафтахім" ужо накіравалі Федэрацыя незалежных прафсаюзаў Расеі, легендарны польскі прафсаюз "Салідарнасць" і іншыя міжнародныя прафсаюзныя цэнтры. 16 кастрычніка калегі Алены Захожай – сябры пяршоўкі БНП заявілі, што гатовыя з 19 кастрычніка далучыцца да свайго лідэра, калі яе патрабаванні не будуць выкананыя.