Дзень Салідарнасці ў Празе (Фота) :: Хартыя'97 :: Навiны

16 кастрычніка беларусы, што зараз знаходзяцца ў Празе, а таксама прадстаўнікі чэскага народа, салідарныя з беларускай дэмакратычнай апазіцыяй, зноў сышліся, каб адзначыць Дзень Салідарнасці. У гэты раз месцам для правядзення акцыі была абрана Крыжоўніцкая плошча каля Карлавага мосту. Вялікая колькасць удзельнікаў безумоўна была звязаная з пачаткам акадэмічнага году - акцыю падтрымалі і беларускія студэнты, якія прыехалі навучацца ва ўніверсітэтах Чэскай Рэспублікі. А сёмай гадзіне дэманстранты запалілі свечкі, разгарнулі бел-чырвона-белыя сцягі, транспаранты і партрэты зніклых барацьбітаў з беларускім рэжымам. Актывісты са студэнцкага асяродку раздавалі ідучым вакол людзям улёткі на чэскай і ангельскай мовах, распавядаючы пра сітуацыю ў Беларусі.

Спакойны ход дэманстрацыі паспрабавала парушыць група нецвярозых фанатаў маскоўскага футбольнага клюбу “Спартак”. Прыцягнутыя святлом свечак і людскім натоўпам каля пяці маладых індывідаў у нецвярозым стане скандыравалі песні і некарэктныя (прарускія) лозунгі. “Лукашэнка -малойца”, - сказаў адзін з фанатаў, чым яшчэ раз пацвердзіў сімпатыю асобных прадстаўнікоў рускага народа да беларускага дыктатара. Тым ня менш, дэманстранты на правакацыі не паддаліся.

Акцыя салідарнасці з Беларуссю скончылася а восьмай гадзіне. Наступная магчымасць сустрэцца і яшчэ раз звярнуць увагу на беларускую праблематыку прадставіцца другога лістапада. На гэты дзень прыпадае беларускае свята Дзяды. “Звяз беларусаў замежжа” разам са студэнцкай ініцыятывай “Свабодная Беларусь”, якія рэгулярна арганізуюць у Празе Дзень Салідарнасці, плануюць правесці другога лістапада ўрачыстую акцыю на Альшанскіх могілках, дзе пахаваны вядомыя прадстаўнікі першарэспубліканскай беларускай, а таксама украінскай і рускай эміграцыі

svobodne-belorusko.wz.cz