Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Вернікі ЗША і Канады салідарныя з беларускімі пратэстантамі 13:26, 18/10/2006
"Сотні евангельскіх цэркваў Амерыкі і Канады і тысячы яе сяброў бачаць грубае парушэнне правоў уласнасці ў дачыненні да нашых беларускіх братоў і сясцёр", – так заявіла ў сваім звароце да Аляксандра Лукашэнкі і ўраду Беларусі Канферэнцыя Славянскіх Цэркваў Усходняга Ўзбярэжжа ЗША па сітуацыі вакол менскай пратэстанскай царквы "Новае жыццё".
Прадстаўнікі 16 штатаў ЗША і Канады на сустрэчы ў горадзе Ефрата амерыканскага штата Пенсільванія адзначылі, што не разумеюць дзеянняў Менгарвыканкама і пазіцыю Вышэйшага Гаспадарчага Суду Беларусі. Бо ўтвораная царква "Новае жыццё" дзейнічала ў адпаведнасці з заканадаўствам краіны: на законных падставах набыла зямельны ўчастак і будынак. Больш таго, уклала сродкі ў добраўпарадкаванне тэрыторыі як прыналежнай да царквы, так і той, якая не адносіцца да яе. А мясцовая ўлада сама пайшла на парушэнне законаў: без усякай падставы канфіскавала будынак Малітоўнага Дома, вернікам хрысціянам забараніла збірацца для набажэнстваў.
"Канферэнцыя звяртаецца да А.Лукашэнкі з просьбай неадкладна вырашыць канфлікт і вярнуць будынак царквы вернікам", – гаворыцца ў прынятым дакуменце. – Сотні хрысціянаў Рэспублікі Беларусь працягваюць галадоўку па ўсёй краіне, чакаючы адказу ад вышэйшых эшалонаў улады. Дзякуем за Вашае разуменне і вырашэнне дадзенага пытання на шчасце грамадзян Беларусі – сяброў царквы "Новае жыццё".
Па даручэнні Канферэнцыі зварот падпісаў Прэзідэнт Саюза славянскіх цэркваў усходняга ўзбярэжжа ЗША біскуп Віктар Лімончанка.
