Тэрытарыяльныя камісіі па мясцовых выбарах будуць створаныя не пазней 20 кастрычніка :: Хартыя'97 :: Навiны

Тэрытарыяльныя выбарчыя камісіі па выбарах дэпутатаў мясцовых Саветаў будуць створаныя не пазней 20 кастрычніка. Затым пачнецца фармаванне акругоў. Аб гэтым паведаміў карэспандэнту БЕЛТА сакратар Цэнтрвыбаркама Беларусі Мікалай Лазавік.

Вылучэнне прадстаўнікоў у склад акруговых камісій павінна завяршыцца 27 кастрычніка. Такіх прадстаўнікоў маюць права дэлегаваць палітычныя партыі, грамадскія аб`яднанні, працоўныя калектывы, а таксама грамадзяне шляхам падачы заяў. Акруговыя выбаркамы будуць створаныя не пазней 30 кастрычніка, а ўчасткі для галасавання – 12 лістапада ўключна. Стварэнне ўчастковых камісій завяршыцца 29 лістапада.

Нагадаем, што працэдура вылучэння кандыдатаў у дэпутаты мясцовых Саветаў пройдзе з 5 лістапада па 4 снежня. З улікам занесеных у Выбарчы кодекс зменаў падпісныя лісты неабходна здаваць адначасова з іншымі дакументамі, якія патрабуюцца для рэгістрацыі. Акрамя таго, прэтэндэнты на дэпутацкі пост абавязаныя прад`явіць пры гэтым выбарчай камісіі пашпарт грамадзяніна Рэспублікі Беларусь. Як распавяла карэспандэнту БЕЛТА старшыня ЦВК Лідзія Ярмошына, такая норма запатрабавалася, паколькі раней бывалі выпадкі, калі выяўлялася, што асобы, якія актыўна ўдзельнічалі ў выбарчай кампаніі, не грамадзяне Беларусі, маюць пашпарт старога савецкага ўзору.

Паводле каляндарнага плану рэгістрацыя кандыдатаў у дэпутаты пройдзе з 5 па 14 снежня.