Расея абмяжоўвае гандаль з Беларуссю (дакумент) :: Хартыя'97 :: Навiны

Расея абмяжоўвае ўвоз тавараў з Беларусі. Па словах намесніка кіраўніка Мінэканамразвіцця Андрэя Шаронава, Масква скараціла закупы прадукцыі з Беларусі на бюджэтныя сродкі. Зроблена гэта было ў адказ на інфармацыю аб дыскрымінацыі расейскіх тавараў пры правядзенні Менскам дзяржзакупаў. Кіруючыся адпаведнымі законамі, Расея памкнулася "адказаць" Беларусі сустрэчнымі абмежаваннямі. На дадзены момант Мінсельгас Расеі, мінрэгіён Расеі і кіраўнікі суб`ектаў РФ забяспечаныя лістамі, датычнымі да падавання інфармацыі пра пастаўкі тавараў беларускай вытворчасці.

У лістах разасланых Мінэканамразвіцця Расеі паведамляецца, што, пачынаючы з 2006 года ў Расейскай Федэрацыі дзейнічае новы Закон датычны да закупаў для дзяржаўных патрэб, у адпаведнасці з якім прадугледжваецца ўсталяванне на тэрыторыі Расеі нацыянальнага рэжыму, які прадугледжвае, што прадукцыя замежных дзяржаў дапушчаецца на роўных умовах з прадукцыяй расейскага паходжання. Раней у расейскім заканадаўстве ўжыванне нацыянальнага рэжыму не прадугледжвалася. Аднак дадзены рэжым усталёўваецца выключна на ўмовах узаемнасці. Калі ў дачыненні да расейскіх пастаўшчыкоў або тавараў расейскага паходжання на тэрыторыі замежнай дзяржавы ўжываюцца дыскрымінацыйныя меры, то Законам прадстаўленае права органу, які ажыццяўляе нарматыўнае правовое рэгуляванне ў сферы размяшчэння заказаў, функцыі якога выконвае Мінэканамразвіцця Расеі, усталёўваць умовы допуску тавараў, якія паходзяць з замежнай дзяржавы.

У гэтай сувязі Мінэканамразвіцця Расеі прааналізавала заканадаўства і нарматыўныя акты, дзеючыя на тэрыторыі Рэспубліцы Беларусь. Было вызначана, што ў Беларусі дзейнічаюць умовы, якія абмяжоўваюць доступ расейскіх прэтэндэнтаў да тэндэрнага гандлю, а таксама накіраваныя на стварэнне няроўных умоў удзелу ў працэдурах закупаў расейскіх і беларускіх прэтэндэнтаў.

З мэтай усталявання ўмоў допуску ў Мінсельгас Расеі, у Мінрэгіён Расеі і кіраўнікам суб`ектаў Расейскай Федэрацыі 14 ліпеня 2006г. былі накіраваныя лісты аб пастаўках тавараў беларускай вытворчасці. Прапаноўваецца абмежаваць увоз у Расею такіх тавараў як керамічная плітка, мэбля, вырабы санітарна-тэхнічныя, кансервы, сінтэтычныя мыючыя сродкі.