Вы находитесь на старой версии сайта "Хартия'97 - НовостиБеларуси". Замените, пожалуйста, адрес сайта Хартии в закладках. Для перехода на новый сайт нажмите здесь.
Cуд адмовіў дэпутату Чыгіру ў аднаўленьні на працы 16:54, 20/10/2006
Сёньня Бабруйскі суд адмовіў дэпутату гарсавету Алесю Чыгіру ў аднаўленьні на працы, паведаміла “Радыё Свабода”. Заяўнік ня згодны з прычынамі звальненьня яго са школы й патрабуе, каб гарадзкі аддзел адукацыі аднавіў яго на працы настаўніка. Алесь Чыгір даводзіць, што ў Беларусі цяпер існуе перасьлед настаўнікаў за палітычныя перакананьні.
Заяўнік кажа, што ў яго застаецца магчымасьць абскардзіць такое рашэньне:
“Буду падаваць касацыйную скаргу ў Магілёўскі абласны суд. Фактычна, як цяпер даводзяць, мяне ня звольнілі. Тлумачаць, што не падоўжылі кантракту. І таму дазволу сэсіі гарадзкога савету на гэта не патрабуецца. Кантракт быў на два гады, і працаваў я настаўнікам гісторыі ў сярэдняй школе №8 гораду Бабруйску.
Я не чакаў іншага рашэньня. Паседжаньне было кароткае. Хутчэй за ўсё, матэрыялы былі падрыхтаваныя загадзя. Казалі, што ў мяне быў прагул 25 сакавіка. Але гэта была субота. Да гэтага ў суботу ніколі не было ўрокаў. Тады ж нібыта быў загад дырэктара школы, каб усе настаўнікі знаходзіліся ў школе. А я ў гэты дзень паехаў у Менск на плошчу”.
Пазбаўлены працы настаўнік мае трох непаўналетніх дзяцей. Каб утрымліваць сям’ю, Алесь уладкаваўся цяпер на працу ў незалежную газэту “Бабруйскі кур’ер”.
