Лукашэнка кіруе горш за ўсіх :: Хартыя'97 :: Навiны

Па адзнацы Сусветнага банка, якасць кіравання беларускай дзяржавай адна з самых горшых сярод краін былога СССР. Да падобнай высновы, піша газета «Беларусы і рынак», падштурхоўваюць дадзеныя, якія знаходзяцца ў дакладзе ВБ "Пытанні кіравання-2006".

У дакладзе дадзены аналіз сітуацыі больш чым у 200 краінах свету. Ацэньваецца кіраванне па шасці галоўных складальніках. Прычым адзнакі выстаўленыя па чатырохбальнай шкале, дзе "+2" – вышэйшая адзнака, а "-2" – ніжэйшая. У цэлым яшчэ горшыя паказчыкі на постсавецкай прасторы толькі ў Таджыкістана і Туркменістана.

У выніку ў катэгорыі "грамадзянскі ўдзел і падсправаздачнасць" (гэта значыць магчымасці рэалізацыі насельніцтвам палітычных і грамадзянскіх правоў чалавека) РБ атрымала -1,68 бала. У катэгорыі "эфектыўнасць дзейнасці ўрада" адзнака склала -1,19 бала, а якасць прылад і інстытутаў рэгулявання, гэта значыць мер, якія абцяжарваюць нармалёвае функцыянаванне рынкаў, ацэнена на -1,53 бала. Па катэгорыях "прававая дзяржава" і "стрымліванне карупцыі" Беларусь атрымала -1,04 і -0,9 адпаведна.

Адзіная плюсавая адзнака беларускай дзяржаве дадзеная за палітычную стабільнасць і адсутнасць гвалту. Па гэтай катэгорыі эксперты Сусветнага банка вызначалі верагоднасць пагрозы гвалтоўнага звяржэння або змены саставу ўрада, у тым ліку пасродкам тэрарыстычных актаў. Аднак і ў гэтай сферы за Беларусь занадта радавацца не варта, бо станоўчая дынаміка ацэньваецца толькі на 0,01 бала.

Як сцвярджаюць аўтары дакладу, устаўшы на шлях рэформаў, краіны змогуць дамагчыся істотнага паляпшэння якасці кіравання і скарачэння маштабаў карупцыі ў параўнальна сціснутыя тэрміны. Так з 2002 г. Украіна, Сербія і Ліберыя дамагліся прыкметных поспехаў у вобласці грамадзянскага ўдзелу і падсправаздачнасці, Грузія – у сферах палітычнай стабільнасці і стрымлівання карупцыі, а Славакія – у вобласці эфектыўнасці дзейнасці ўрада.