«Независимая газета»: Беларусі абвешчаная гандлёвая вайна :: Хартыя'97 :: Навiны

Расейская «Независимая газета» перанос саміту кіраўнікоў дзяржаў СНД звязвае, у тым ліку, з эканамічнымі чыннікамі. Па меркаванні выдання, Беларусі абвешчаная гандлёвая вайна.

У мінулую нядзелю галоўны санітарны лекар Расеі Генадзь Анішчанка паўтарыў выказаныя ім у верасні прэтэнзіі адносна магчымага рээкспарту забароненага ў Расеі малдаўскага і грузінскага віна праз Украіну, Беларуь і Азербайджан. Гэтым разам у сваім выступе ён вылучыў ролю Беларусі. "У нас ёсць падставы лічыць, што ёсць нейкая дамоўленасць паміж Украінай, Беларуссю і Азербайджанам аб тым, што яны будуць дапамагаць гэтым двум краінам (Грузіі і Малдове – "НГ") выйсці на расейскія рынкі любым чынам, – адзначыў Анішчанка. – А ўлічваючы, што паміж Беларуссю і Расеяй няма мытных меж, нас гэтае пытанне, безумоўна, хвалюе і будзе хваляваць датуль, пакуль мы не атрымаем поўнай празрыстасці".

У сераду да Анішчанкі далучыўся намеснік міністра эканамічнага развіцця і гандлю Андрэй Шаронаў. Адказваючы на пытанні дэпутатаў у Дзярждуме, ён паведаміў аб тым, што яшчэ ў ліпені накіраваў у Мінсельгас, Мінрэгіёнразвіцця і кіраўнікам суб`ектаў Федэрацыі ліст з прапановай абмежаваць расейскія дзяржзакупы ў Беларусі. Адрасатам ліста прапаноўваецца прадставіць у МЭРГ свае заўвагі адносна пераліку беларускіх тавараў, ад закупаў якіх варта адмовіцца расейскім дзяржаўным муніцыпальным органам. У той жа дзень прэс-служба МЭРГ размясціла на сайце міністэрства паведамленне, з якога вынікае, што рашэнне абмежаваць расейскія дзяржзакупы ў Беларусі звязана з тым, "што ў Беларусі дзейнічаюць умовы, якія абмяжоўваюць доступ расейскіх прэтэндэнтаў да тэндэравага гандлю, а таксама накіраваныя на стварэнне няроўных умоў удзелу ў працэдурах закупаў расейскіх і беларускіх прэтэндэнтаў". Іншымі словамі, Менск абвінавацілі ў дыскрымінацыі расейскіх таваравытворцаў пры правядзенні ўласных дзяржзакупаў. Па сутнасці, піша «Независимая газета», Беларусі была абвешчаная гандлёвая вайна.