Суд над Зміцерам Дашкевічам будзе закрытым :: Хартыя'97 :: Навiны

Cуд над маладзёвым лідэрам Зміцерам Дашкевічам, прызначаны на 30-га кастрычніка, будзе праходзіць у закрытым рэжыме. Аб гэтым стала вядома праваабарончаму цэнтру “Вясна”. Справу будзе разглядаць суддзя Ала Булаш – намесьніца старшыні суду Кастрычніцкага раёну Менску. Матывацыю закрыцця працэсу ў судзе не пазначылі. Праваабаронцы лічаць гэты выпадак абуральным.

-- Па-першае, - кажа юрыст Валянцін Стэфановіч, - Дашкевіч абвінавачаны па арт. 193.1 КК Рэспублікі Беларусь (дзейнасць ад імя незарэгістраванай арганізацыі), што парушае яго канстытуцыйнае права на свабоду асацыяцый. Па-другое, працэс хочуць зрабіць закрытым: бяз допуску журналістаў і шырокага колу грамадскасці – у лепшых традыцыях сталінскіх часоў. Мы лічым, што справа мае грамадскі рэзананс і таму павінна быць адкрытай. Мяркуем, што ўлады такім чынам хочуць схаваць падрабязнасці мэтадаў працы следчых органаў, якія ў масавым парадку выклікалі моладзь на допыты, аказвалі на актывістаў ціск. Чарговы раз патрабуем неадкладнага вызвалення Зміцера Дашкевіча і лічым яго пераслед палітычным.

Нагадаем, лідэр арганізацыі “Малады Фронт” Зміцер Дашкевіч быў узяты пад варту ў межах крымінальнай справы па арт. 193.1 КК Рэспублікі Беларусь (дзейнасць ад імя незарэгістраванай арганізацыі). 21 верасьня 2006 года яму было прад’яўлена афіцыйнае абвінавачанне, мера стрымання пакінутая бяз зменаў.

Будынак Кастрычніцкага суда знаходзіцца па адрасе: вул. Сямашкі, 33.