Беларусь будзе плаціць за газ 230 даляраў? :: Хартыя'97 :: Навiны

Украіна будзе пакупаць газ па кошце 130 даляраў за тысячу кубаметраў у першым паўгоддзі 2007 года толькі ў тым выпадку, калі выканае ўсе палітычныя ўмовы, якія паставіла Расея. Але нават калі ўсе пастаўленыя Расеяй умовы будуць выкананыя, з другога паўгоддзя Украіна будзе плаціць ужо 230 даляраў, "як і Беларусь з Малдовай". Такое меркаванне выказаў сёння, 23 кастрычніка, экс-старшыня "Нафтагаз Украіны", народны дэпутат фракцыі "Наша Украіна" Аляксей Іўчанка.

"Не дзіўна, што расейскі бок у перагаворах адносна кошту на газ высоўвае ўмовы недалучэння Украіны да НАТО, неўваходжання ў ВТО без Расеі, падаўжэнне тэрміна знаходжання Чарнаморскага флоту на нашай тэрыторыі. Я думаю, што ёсць шэраг іншых патрабаванняў, у прыватнасці, перадача газатранспартнай сістэмы. За гэта Украіна будзе пакупаць газ па кошце 130 даляраў за тысячу кубаметраў у першым паўгоддзі 2007 года", – заявіў, у прыватнасці, Аляксей Іўчанка. Па яго словах, нават калі ўсе пастаўленыя Расеяй умовы будуць выкананыя, з другога паўгоддзя Украіна будзе плаціць ужо 230 даляраў, як і Беларусь з Малдовай.

"Гэта сведчыць аб адным: перагаворная група, якая сёння адказвае ад імя ўраду за газавыя перагаворы, абсалютна ў аднабаковым парадку згаджаецца са ўсімі патрабаваннямі Расеі. І гэта нягледзячы на тое, што папярэднія пагадненні і кантракты былі падпісаныя на іншых умовах. А менавіта, газ па кошце 95 даляраў тэрмінам на 5 год, дамоўленасць, што ў аднабаковым парадку ніхто з бакоў не можа змяніць кошт на газ і транзітную стаўку", – адзначыў экс-старшыня "Нафтагаза" і рэзюмаваў: "Гэта пацвярджае, што ўрад не займаецца перагаворамі, а атрымоўвае заданне ад расейскага боку".

Нагадаем, што раней прэм`ер-міністр Украіны Віктар Януковіч заявіў, што кошт на газ для Украіны ў наступным, 2007 годзе не будзе перавышаць 130 даляраў за тысячу кубаметраў. Менавіта гэты кошт газу быў закладзены ў аснове фармавання бюджэту-2007.