Нямецкія сябры дыктатара :: Хартыя'97 :: Навiны

Нарэшце, праз 11 гадоў нямецкі эксперт падтрымаў Лукашэнку ў яго імкненні працаваць "па Гітлеру". Эксперт Савета па знешняй палітыцы Нямеччыны Аляксандр Рар у інтэрэрв`ю "Белгазеце" прызнаўся: "... нельга быць цынікам, але бізнэс у Беларусі ўсёткі развіваецца. І даволі шмат еўрапейскіх бізнэс-структур мяркуюць, што ў вашай сітэме, дзе ёсць гарантаваны прэзідэнтам і урадам парадак, можна працаваць".

Нагадаем, што менавіта пра гэты гарантаваны парадак яшчэ ў лістападзе 1995 года шчыра гаварыў Лукашэнка ў інтэрв`ю нямецкай газеце “Handelsblatt”:

"Нямецкі парадак фармаваўся стагоддзямі. Пры Гітлеру гэтае фармаванне дасягнула найвышэйшай кропкі. Гэта тое, што адпавядае нашаму разуменню прэзідэнцкай рэспублікі і ролі ў ёй прэзідэнта".

Рар выдатна валодае рускай, сваёй другой роднай мовай, таму сказанае не спішаш ні на недакладнасць перакладу, ні на дрэннае веданне мовы. Нямецкі эксперт выказаўся гранічна ясна: пабудова таталітарнай фашысцкай дзяржавы адказвае інтарэсам еўрапейскага, чытай нямецкага, бізнэсу.

Рар – у курсе беларускай сітуацыі і ведае, што ў аснове гэтага "парадку" бясследна зніклыя апаненты ўлады, палітвязні, сярод якіх і кандыдат у прэзідэнты на выбарах 2006 г., масавыя арышты, жорсткія падаўленні мірных дэманстрацый, выключэнні студэнтаў, запалохванне грамадзян і г.д. Таталітарызм па поўнай праграме, з чалавечымі ахвярамі.

Напэўна, я і не звярнуў бы ўвагі на гэтае выказванне Рара, вядомага сваімі зняважлівымі адносінамі да беларускай апазіцыі і лабіяваннем развіцця адносін з рэжымам Лукашэнкі, але менавіта гэтую цытату з непрыхаваным задавальненнем прывяло БТ, каб ніхто не сумняваўся ў невыпадковасці сказанага.

Андрэй Саннікаў – міжнародны каардынатар Хартыі`97, былы намеснік міністра замежных спраў Беларусі.