Скаўтаў і батанікаў прымусяць любіць Лукашэнку :: Хартыя'97 :: Навiны

Беларускія моладзевыя арганізацыі будуць аб`яднаныя. Такую задачу на сустрэчы з лідэрамі Беларускага рэспубліканскага саюза моладзі, Беларускай піянерскай арганізацыі, Беларускага камітэта моладзевых арганізацый паставіў Аляксандр Лукашэнка.

Па яго словах, да 1 студзеня неабходна пабудаваць дакладную структуру, прадугледзіць пытанні кадраў і фінансава-гаспадарчай дзейнасці арганізацыі. Датычна ж мэт аб`яднання, Аляксандр Лукашэнка сказаў, што, цытуем: "Ідэя адзінства добрая. Гэта дазволіць не распыляць кадравы і фінансавы патэнцыялы".

Карэспандэнту "Нямецкай хавлі" у прэс-службе БРСМ не змаглі ратслумачыць, як будзе адбывацца аб`яднанне моладзевых арганізацый, адзначыўшы, што на сустрэчы з Лукашэнка была пастаўленая задача "аб прапрацоўцы дадзенага пытання, і ён будзе прапрацаваны толькі да сярэдзіны снежня".

У той жа ж час, як лічыць старшыня ЦК Ленінскага камуністычнага саюза моладзі Беларусі Зміцер Яненка, гаворка можа ісці пра аб`яднанне 39 арганізацый, якія ўваходзяць у Беларускі камітэт моладзевых арганізацый. Пару гадоў таму дадзеная структура падмяніла сабою Нацыянальны савет моладзевых і дзіцячых арганізацый "Рада". Зараз гэтыя 39 арганізацый стануць палітызаванымі, аднак, па меркаванні Зміцера Яненкі, у гэтым іх сябры самі вінаватыя.

"Тыя арганізацыі, якія сыйшлі з Нацыянальнага савета дзіцячых і моладзевых арганізацый "Рада" і ўступілі ў Камітэт моладзевых арганізацый, яны ўжо зрабілі палітычны крок. Яны стаялі перад выбарам, альбо займацца сваімі праблемамі паўсюдна і пры гэтым могуць быць праблемы з боку органаў рэгістрацыі, альбо сыйсці пад крылца прэзідэнцкіх структур, якія стваралі гэты КМА. І таму яны ўжо зрабілі палітычны ўчынак, сыйшоўшы туды. Хацелі яны, не хацелі, яны гэта ўжо зрабілі. Зразумела, зараз ад іх будуць патрабаваць большага ўплыву на моладзевую сераду ў палітычных пытаннях, якія сёння, да шчасця, БРСМ не можа выканаць. Гэта заказ ўлады на палітызацыю ўсяго моладзевага сектара. І зараз скаўты будуць працаваць са скаўтамі ў плане, каб яны больш падтрымлівалі і горача любілі Лукашэнку. Аматары батанікі будуць сваіх батанікаў агітаваць. І гэтак далей і таму падобнае", – сказаў Яненка ў інтэрв`ю "Нямецкай хвалі".

Па меркаванні Яненкі, зараз ад усіх моладзевых структур, якія ўваходзяць у КМА, будуць чакаць дакладнай працы па выкананню дзяржзаказа ўлады. Відавочна, ў гэтым асноўная мэта аб`яднання.