Міжнародныя арганізацыі патрабуюць аднавіць расследаванне забойства Веранікі Чаркасавай :: Хартыя'97 :: Навiны

У дзень другой гадавіны трагічнай гібелі Веранікі Чаркасавай, Міжнародная федэрацыя журналістаў накіравала адкрыты ліст на імя Аляксандра Лукашэнкі, у якім патрабуе аднавіць расследаванне крымінальнай справы аб забойстве журналісткі, знайсці і пакараць у судовым парадку яе забойцаў.

МФЖ разам з гэтым заклікае ўсіх неабыякавых людзей далучыцца да грамадскай кампаніі па пошуку і прыцягненні да адказнасці забойцаў Веранікі Чаркасавай і прапануе таксама патрабаваць ад уладаў працягнуць расследаванне. “Дашліце зварот да беларускіх уладаў з патрабаваннем аднавіць крымінальную справу аб забойстве Веранікі Чаркасавай і прыцягнуць яе забойцаў да адказнасці Аляксандру Лукашэнку, Прэзідэнту Беларусі. Факс: (+375 17) 222-30-20, е-mail: press@president.gov.by“, - заклікае МФЖ.

Як паведамляе прэс-служба БАЖ, у лісце да Лукашэнкі Міжнародная федэрацыя журналістаў выказвае заклапочанасць, што беларускія ўлады не толькі дагэтуль не здолелі знайсці і пакараць забойцаў В. Чаркасавай, але і грэбуюць сур’ёзнымі доказамі падчас расследавання. МФЖ абураюць таксама “спробы безгрунтоўна абвінаваціць сына забітай журналісткі Антона Філімонава,” — гаворыцца ў звароце.

Міжнародная праваабарончая арганізацыя звяртае ўвагу Лукашэнкі, што “ў той жа самы час некалькі журналісцкіх расследаванняў засведчылі, што незадоўга перад забойствам Веранікі Чаркасавай журналістка распачала праверку абвінавачванняў у бок беларускага “Інфабанку” ў ажыццяўленні нелегальных продажаў зброі Іраку. У жніўні 2004 г. банкаўскія рахункі “Інфабанку” былі замарожаныя ў ЗША. Крыху пазней Вераніка Чаркасава брала ўдзел у арганізаванай “Інфабанкам” паездцы ў Багдад. Фотаздымкі з гэтай паездкі былі адзінымі рэчамі, якія зніклі з кватэры Веранікі Чаркасавай пасля яе забойства.”

Міжнародная федэрацыя журналістаў лічыць, што “няздатнасць беларускіх уладаў прыцягнуць да адказнасці забойцаў В. Чаркасавай кідае цень на імідж Беларусі і гатоўнасць беларускага ўраду абараняць асноўныя правы чалавека. Толькі праз знаходжанне забойцаў В. Чаркасавай і прыцягненне іх да судовай адказнасці Беларусь можа прадэманстраваць сваім грамадзянам і міжнароднай супольнасці сваю падтрымку свабоды прэсы і гатоўнасць абараняць жыцці журналістаў.”