Ірына Казуліна: «Ім прыйдзецца адказваць перад сваімі дзецьмі, сумленнем і гісторыяй» :: Хартыя'97 :: Навiны

"Санкцыі ў дачыненні да суддзяў і пракурораў, якія вынасілі "палітычныя прысуды", уводзіць, вядома, трэба. Але шчаслівая асаблівасць майго характару – не азірацца назад. Я ўжо абыякавая да гэтых людзей. Санкцыі – гэта дробязь у параўнанні з тым, што гэтым "катам" прыйдзецца адказваць перад сваімі дзецьмі, перад сваім сумленнем і перад гісторыяй", – заявіла Ірына Казуліна, жонка палітвязня Аляксандра Казуліна, каментуючы прэс-цэнтру Хартыі`97 забарону на ўезд у краіны Еўразвяза, уведзеную ў дачыненні да пракурораў і суддзяў, якія вынеслі прысуды экс-кандыдату ў прэзідэнты і актывістам грамадзянскай ініцыятывы па назіранні за выбарамі "Партнёрства".

Па меркаванні Ірыны Казулінай, Еўразвяз сёння "павінен грамчэй казаць пра нелегітымнасць Лукашэнкі, грамчэй рабіць заявы, каб гэта дайшло і да простых беларускіх грамадзян".

"Трэба абавязкова дзейнічаць. Калі ўсе маўчаць, значыць, усе змірыліся", – упэўненая жонка экс-кандыдата.

Нагадаем, што Аляксандр Казулін, які знаходзіцца ў зняволенні ў віцебскай калоніі, з 20 кастрычніка пачаў галадоўку пратэсту. Яе мэта – прыцягнуць увагу Савета Бяспекі ААН да "самавольства, якое дзеецца ў Беларусі".

Па словах жонкі палітвязня, сёння яна зноў тэлефанавала начальніку калоніі "Віцьба-3", цікавілася станам здароўя мужа.

"Начальнік калоніі адказаў суха і сцісла. Сказаў, што ўсё добра, лекар аглядае яго кожны дзень. Я прасіла даць мне тэлефон лекара, але ён мне сказаў, што ў таго толькі ўнутраны тэлефон і звязацца з ім нельга...", – паведаміла Ірына Казуліна.

У чацвер Аляксандра Казуліна наведае адвакат Ігар Рынкевіч.

"Сёння адзіная магчымасць даведацца пра стан здароўя майго мужа і другога галадаючага – Сяргея Скрабца – гэта як мага часцей сустракацца ім з адвакатам. Ліміт наведвання сваякамі, нажаль, ужо вычарпаны", – сказала Казуліна.