Барадзін трызніць :: Хартыя'97 :: Навiны

Дзяржсакратару "саюзнай дзяржавы" Беларусі і Расеі Паўлу Барадзіну ў сераду спаўняецца 60 год. У інтэав`ю "Комсомольской правде" ён заявіў, што сталіцай "саюза" двух дзяржаў будзе Якутск. Па яго словах, аб гэтым ён ужо паведаміў прэзідэнтам Пуціну і Лукашэнке.

"А я там мэрам быў, – растлумачыў Барадзін сваю пазіцыю. – Там "цёпла". Нават зімой можа "пацяплець" з мінус 52 да мінус 48. І яшчэ таму, што там тэрыторыя 3,2 мільёны квадратных кіламетраў. Як уся Еўропа".

На пытанне, ці хоча ён такім чынам "замарозіць "саюз"", Барадзін адказаў:"Ты што? Наш "саюз" ужо не замарозіш". Па яго словах, "у гэтым годзе "саюзны" бюджэт – звыш 3 мільярдаў расейскіх рублёў. А ў наступным годзе будзе павялічаны на 36%, гэта больш за 4 мільярды".

Барадзін распавёў пра "актыўную" дзейнасць "саюзнай дзяржавы". "Продыху няма, – адзначыў ён. – Гэтымі днямі прайшлі сумесныя калегіі МУС і Мінабароны двух краін, засядала камісія па тарыфах – вось будзем здымаць узаемныя абмежаванні ў гандлі, якія яшчэ засталіся".

На пытанне, як у Якуціі звычайна віншуюць юбіляраў, Барадзін адказаў: "Усіх ворагаў збіраюць, робяць з іх шашалыкі, п`юць кумыс і закусваюць мясам ворага", удакладніўшы, што гэта ён кажа сур`ёзна, а ўсіх ворагаў ён ужо даўно з`еў "з лукам". Што ж датычыцца да сяброў, то яны, па яго словах, ужо ў Маскве. "Усіх якутаў, хто мае сябры, я даўно перавёз у Маскву. Іх 48 чалавек – і ў міністэрствах, і ў пракуратуры", – заявіў Барадзін.

Свой юбілей Барадзін адзначыць, "выпіўшы газаванай вады і з`еўшы кавалачак кавуна".