Казулін і Скрабец працягваюць галадоўку ў калоніі :: Хартыя'97 :: Навiны

Экс-кандыдат у прэзідэнты Аляксандр Казулін і былы дэпутат парламента Сяргей Скрабец працягваюць галадоўку пратэсту ў калоніі "Віцьба-3". Аб гэтым БелаПАН паведаміў брат С.Скрабца Аляксандр Скрабец.

Па яго словах, нядаўна ён атрымаў ліст ад брата. Зняволены Скрабец напісаў, што адміністрацыя калоніі прапаноўвала яму адмовіцца ад намеру праводзіць галадоўку разам з Казуліным. "Наўзамен яму намякнулі, што калі ён не будзе галадаць, то, магчыма, будзе станоўча разгледжанае пытанне аб яго ўмоўна-датэрміновым вызваленні або аб прымяненні да яго амністыі", – сказаў А.Скрабец. Аднак Сяргей Скрабец ад такой прапановы адмовіўся.

Сёння С.Скрабцу споўнілася 43 гады. "Я тэлефанаваў у калонію і прасіў, каб брату далі патэлефанаваць дахаты. Аднак у калоніі мне сказалі, што Сяргей не напісаў адпаведную заяву, а падказваць яму зрабіць гэта яны не абавязаныя. Але я спадзяюся, што ён усёткі сам здагадаецца гэта зрабіць і яшчэ патэлефануе сёння", – сказаў Аляксандр Скрабец.

Нагадаем, А.Казулін пачаў бестэрміновую палітычную галадоўку 20 кастрычніка. Ён пратэстуе супраць "дзеючага ў краіне беззаконня", а таксама спрабуе прыцягнуць увагу Савета бяспекі ААН да сітуацыі ў Беларусі. С.Скрабец пратэстуе ў знак салідарнасці с экс-кандыдатам у прэзідэнты, а таксама ў сувязі з тым, што дагэтуль не быў прадстаўлены да ўмоўна-датэрміновага вызвалення.