Мінфін абмяркоўвае ўльтыматум Пуціна :: Хартыя'97 :: Навiны

Беларусь гатовая абмяркоўваць з Расеяй магчымасць заключэння асобнага пагаднення аб раздзелу беларускіх экспартных пошлін на нафтапрадукты, заявіў журналістам у чацвер ў Менску міністр фінансаў Беларусі Мікалай Корбут, каментуючы заяву прэзідэнта Расеі Уладзіміра Пуціна аб магчымасці абмежавання паставак нафты ў Беларусь у выпадку недасягнення дамоўленнасцяў аб размеркаванні беларускіх мытных пошлін на нафтапрадукты паміж бюджэтамі двух краін.

"Па пытанні размеркавання мытных пошлін павінна быць асобнае пагадненне. Сёння дзейнічае раней падпісанае пагадненне, у адпаведнасці з якім кожны бок атрымоўвае экспартныя мыты ў адпаведнасці з нацыянальным заканадаўствам. Пагаднення аб размеркаванні пошлін сёння няма", – падкрэсліў М.Корбут.

Па яго словах, урад Беларусі "пару тыдняў таму атрымаў ад расейскага боку праект пагаднення аб размеркаванні пошлін". "Сёння мы над ім працуем", – паведаміў міністр.

Як раней паведамляў Інтэрфакс, У.Пуцін заявіў, што Расея можа ўвесці абмежаванні на пастаўкі сырой нафты ў Беларусь, калі не атрымаецца дасягнуць дамоўленнасці з Менскам па стандартах мытных пошлін.

"Калі ў нас не атрымаецца дасягнуць дамоўленнасцяў, нам прыйдзецца ўводзіць абмежаванні, чаго нам вельмі не хочацца, таму што ў значнай частцы па пытаннях падобнага роду ў нас атрымоўваецца дасягнуць пагадненняў", – сказаў У.Пуцін, адказваючы на пытанні расейцаў у прамым эфіры.

Прэзідэнт прызнаў, што сёння ў Расеі і Беларусі "ніяк не атрымоўваецца дамагчыся агульных стандартаў у пытанні мытных пошлін, як па імпарце, так і па экспарце".

У сувязі з гэтым, адзначыў У.Пуцін, "нас некаторыя рэчы турбуюць: мы глядзім на аб`ёмы паставак сырой нафты на беларускія НПЗ, глядзім на запатрабаванні самой рэспублікі і глядзім на тое, колькі пастаўляецца потым нафтапрадуктаў за мяжу". "Тут нам, вядома жа, трэба наводзіць парадак у працэсе нармалёвага дыялогу з нашымі беларускімі калегамі", – сказаў прэзідэнт РФ.