Мілінкевіч: «Андрэй Сахараў спрабаваў зрабіць палітыку маральнай» :: Хартыя'97 :: Навiны

Прэмія, якой сёньня Эўрапарлямэнт узнагародзіў лідэра дэмакратычных сілаў Беларусі Аляксандра Мілінкевіча, носіць імя Андрэя Сахарава — знакамітага савецкага праваабронцы і навукоўца-ядзершчыка. З гэтай нагоды Аляксандар Мілінкевіч сказаў «Радыё Свабода», што імя Андрэя Сахарава ён упершыню пачуў тады, калі знакаміты навуковец яшчэ не займаўся правабарончай дзейнасьцю. "Ён — фізык, і я — фізык. І я ведаў ягоныя працы, ведаў яго як выдатнейшага навукоўца",— заўважыў А.Мілінкевіч.

Калі ж Сахараў стаў народным дэпутатам, згадвае ляўрэат ягонай прэміі, уся краіна слухала яго: "І гэта быў голас праўды, голас маралі".

Мілінкевіч адзначыў, што ён асабліва паважаў Андрэя Сахарава за тое, што той "спрабаваў зрабіць палітыку маральнай".

"Гэта прэмія -- узнагарода для тысячаў і тысячаў людзей, якія прадэманстравалі, асабліва вясною, і мужнасьць, і жаданьне змагацца за сваю годнасьць, за Беларусь. І гэта самая высокая ацэнка дэмакратычных сілаў Беларусі, што змагаліся на працягу апошніх гадоў. І сёньня змагаюцца. Таму я лічу, што я не павінен браць гэтую прэмію сабе. І не зьбіраюся гэта рабіць. Прэмія пойдзе на падтрымку рэпрэсаваных людзей, якія пацярпелі падчас прэзыдэнцкай выбарчай кампаніі", -- адзначыў лідэр апазіцыі.

Прэмія імя А.Сахарава “За свабоду думкі“ заснавана Эўрапарлямэнтам у 1988 годзе. Яна і прызначаецца штогод за “дасягненьні ў справе абароны правоў чалавека і яго асноўных свабодаў”.