Як сябе насамрэч адчувае Казулін на 8-ы дзень галадоўцы? :: Хартыя'97 :: Навiны

Экс-кандыдат у прэзідэнты Беларусі, палітвязень Аляксандр Казулін восьмы дзень галадае ў выпраўленчай калоніі "Віцьба-3". Разам з ім у галадоўцы з патрабаваннем разглядзець сітуацыю ў Беларусі ў Савеце Бяспекі ААН, удзельнічае былы дэпутат, таксама палітвязень Сяргей Скрабец. Адміністрацыя калоніі сцвярджае, што зняволеныя не маюць праблем са здароўем, а Аляксандр Казулін нібы нават выглядае "вельмі бадзёрым". Тым не менш, праваабаронца Алег Воўчак не выключае, што ўлады могуць утойваць праўдзівы стан здароўя зняволеных.

"Я нічому не давяраю. Пакуль сам не ўбачу, не паверу. Адна справа, што гавораць, іншая справа, што адбываецца там, за кратамі, насамрэч. А можа, не дай Бог, у Казуліна прыступ быў на чацвёрты дзень галадоўцы? Хто нам скажа? Узгадайце, як было з Міхаілам Марынічам (былы міністр знешнеэканамічных сувязяў, таксама палітвязень – Хартыя’97) Калі б самі зняволеныя не перадалі на волю ліст і не распавялі аб тым, што ў Міхаіла Апанасавіча быў інсульт, мы бы так нічога б не пазналі, і ён наогул мог бы памерці ў Аршанскай калоніі.

Вядома, мы тэлефануем у калонію кожны дзень. Каб яе кіраўніцтва ведала, што нясе за Казуліна асабістую адказнасць. Вось ужо доўгі час сустрэчы з ім дамагаецца амбасадар Нямеччыны Марцін Хекер. Будзем спадзявацца таксама, што ў панядзелак з Аляксандрам Уладзіслававічам сустрэнецца адвакат Ігар Рынкевіч", – заявіў у інтэрв`ю прэс-цэнтру Хартыі`97 Алег Воўчак.